Ճարտարագիտական համալսարանի ռեկտորը՝ ուսման վարձավճարների թանկացման մասին

Պետական բուհերում ուսման վարձավճարների թանկացման դեմ պայքարը սարերի հետեւում չէ: Օգոստոսի 4-ին Մաշտոցի պուրակում կլինի քննարկում, ինչից հետո կսկսվեն գործնական քայլերը: Եվ այս քայլերն ամենից շատ մտահոգում են այն բուհերի ռեկտորներին, որտեղ վարձերը թանկացվել են: Դրանցից մեկն էլ Ճարտարագիտական համալսարանն է՝ նախկին Պոլիտեխնիկը:

Ըստ ռեկտոր Արա Ավետիսյանի, այստեղ ուսվարձը միջին հաշվով թանկացել է 11,2 տոկոսով, եւ դրանք ուղղվելու են լաբորատորիաների ստեղծմանն ու վերազինմանը: Այսինքն, առկա են թանկացման կոնկրետ հիմնավորումներ, ու ռեկտորը պահանջում է, որ այդ հիմքերի շուրջ պայքարն սկսելուց առաջ մտածեն ու հաշվարկներ անեն նաեւ ակտիվիստները: «Մեզ մոտ, բարձրացված վիճակում, ավելի քան երկու անգամ քիչ է ուսման վճարը, քան Հայաստանում Ամերիկյան համալսարանում նույն մասնագիտությամբ իրականացվող կրթության վարձը»,- «համեստորեն» համեմատեց Արա Ավետիսյանը, ում հետ «Հրապարակ»-ը զրուցեց ուսման վճարների թանկացման դեմ խմորվող բողոքի ակցիաների թեմայի շուրջ:

- Պարոն Ավետիսյան, քաղաքացիական պայքարը տեղափոխվելու է պետական բուհեր՝ վարձավճարների թանկացման դեմ: Դա Ձեզ մտահոգո՞ւմ է:

- Հարցը ոչ այնքան վճարի բարձրանալն է, այլ՝ հարցադրումը: Հարցադրումը ձեւակերպեիք այսպես՝ իսկ ինչի՞ համար է բարձրացել, եւ արդյո՞ք այդ բարձրացումը բավարարում է այդ խնդիրների լուծմանը, երբ համալսարանը պարտավորված է ապահովել բարձրորակ կրթություն:

- Հայաստանի անկախացումից ի վեր մեր երկրում կրթությունը վճարովի է, բայց կրթության որակից մշտապես դժգոհում են, այն համարժեք չի համարվում ուսման վճարի չափին:

- Ես Ձեզ խորհուրդ եմ տալիս ծանոթանալ վերջին 2 տարվա Ճարտարագիտական համալսարանի հաջողություններին եւ համոզվել' կրթությունը բավարարո՞ւմ է, թե՞ չի բավարարում:

- Իսկ այդքան բարձրացումով ի՞նչ է հնարավոր փոխել կրթության որակի առումով:

- Դա ընդամենը արդեն հաշվառված եւ իրագործվող նախագծի մի գործողություն էր, ճարտարագիտական ազգային լաբորատորիաների ստեղծումը, որն իրականացվել է եւ սեպտեմբերից արդեն գործարկվելու է: Կարող եք գալ, ծանոթանալ, թե ինչպիսի փոփոխությունների է ենթարկվել, լաբորատոր բազաների մասով ինչպիսի փոփոխություն է տեղի ունեցել:

- Պարոն Ավետիսյան, ակտիվիստների ակցիաներն ի՞նչ ազդեցություն կունենան Ձեր որոշման վրա:

- Ես նրանց նույնպես խորհուրդ կտամ, եթե գրագետ մասսա է, գալ-տեղում ճշտել, թե ինչքան է բարձրացել ու ինչի վրա է ծախսվելու, նոր կտեսնենք' շարունակելո՞ւ են բողոքել, թե՞ չէ:

- Այսինքն, որոշումը վերանայելու փոխարեն, կփորձեք ապացուցել, որ արդարացվա՞ծ է թանկացումը:

- Ես հրավիրում եմ բոլորին՝ տեսնեն ինչ է կատարվում, ինչի վրա է ծախսվում, հետո նոր որոշեն: Նախ, թող նրանք խնդրին ծանոթանան, հետո նոր հետեւանքի դեմ բողոքեն՝ անհրաժե՞շտ է իրականացնել անհրաժեշտ պահանջներին համապատասխան կրթություն, թե՞ ոչ, թե՞ առանց լաբորատորիաների կարելի է ճարտարագետ պատրաստել, որ առանց դրա աշխատեն ժամանակակից տնտեսությունում: Չէ՞ որ այդ ամենը մշակվել, քննարկվել է եւ գիտխորհրդի որոշմամբ ընդունվել:

- Իսկ ակտիվիստ ուսանողներին կփորձե՞ք պատժել բացականերով կամ բուհից հեռացման սպառնալիքներով:

- Ես ուսանողներին կբացատրեմ, որ գան-մասնակցեն դասերին, որից հետո քննարկեն հարցը եւ ոչ թե դասերը բաց թողնեն: Դասերից հետո թող գան համալսարանի ղեկավարության հետ քննարկեն՝ ինչու բարձրացավ, որպեսզի համապատասխան ուժերն այդ խնդիրը չօգտագործեն ինչ-ինչ շահերին:

- Իսկ որպես մտավորական, երիտասարդների քաղաքացիական դրսեւորումներին ինչպե՞ս եք վերաբերվում:

- Եթե դա մտածված է, քննարկումներ են արվում, ապա քաղաքացիական ձեւավորման առումով քաղաքացիական շարժումը միշտ անհրաժեշտ է:

Առավել մանրամասն՝ թերթի այսօրվա համարում