«Ալիկ Սարգսյանի հանցագործությունն ինձ են վերագրում». Վարդգես Գասպարի

Այսօր Կենտրոն և Նորք–Մարաշ վարչական շրջանների ընդհանուր իրավասության դատարանում տեղի ունեցավ Վարդգես Լևոնի Գասպարիի դատական նիստը, որը նախագահում էր դատավոր Մխիթար Պապոյանը։ Չնայած այն հանգամանքին, որ դատական նիստին չէր ներկայացել Վարդգես Գասպարիի պաշտպանը, դատավորն, այնուամենայնիվ,  որոշեց շարունակել դատական նիստը։

Վարդգես Գասպարին ներկայացրեց իր պահանջները՝ հայտարարելով, որ դատախազը պատշաճ քննություն չի իրականացրել գործի շրջանակներում, ուստի հանցավոր է, և պետք է հեռացվի աշխատանքից՝ իր ստախոս աշխատակիցների հետ միասին։ Ըստ Գասպարիի՝ դատավորը թաքցրել է գործող առկա քաղաքացիների՝ Լալա Ասլիկյանի, Սոնա Այվազյանի, Լենա Նազարյանի ցուցմունքները։

«Երբ Ալիկ Սարգսյանը հրեց ցուցարարներից մեկին և վնասեց նրա ուսը, այդ ժամանակ ես նրան ասացի խուլիգան և հանցագործ։ Ներկայումս նրա հանցագործությունն ինձ են վերագրում», – ասաց  Գասպարին։

Նա նաև դատարանի ուշադրությունը հրավիրեց  լրատվամիջոցների տեսագրությունների վրա, որոնցում  շատ պարզ երևում է, թե ինչպես է Ալիկ Սարգսյանը հրում  քաղաքացուն։ Ի դեպ՝ այդ տեսագրությունները ներկայացված չեն դատարանին։ Դատարանն այս գործով այսօր որոշում կկայացնի. դատավորը այս պահին խորհրդակցական սենյակում է։