Մենք գործ ունենք մանյակների հետ. Հայկ Գևորգյան

«Կարևորն այն է, որ ոչ ոք չի հավատացել, որ ես վրաերթի եմ ենթարկել այդ մարդուն և թողել ու գնացել։ Ես ինչպե՞ս կարող էի մարդուն անօգնական թողնել և հեռանալ», – այսօր լրագրողների հետ հանդիպման ժամանակ ասաց «Հայկական ժամանակ» օրաթերթի լրագրող Հայկ Գևորգյանը։

Նա նշեց, որ իր համար կարևորն այն է, որ իր համբավը վերականգնվի և բացահայտվի այս գործը։

«Մենք համոզվել ենք , որ գործ ունենք մանյակների հետ», – նկատեց լրագրողը։

Նա տեղեկացրեց, որ այս ամենի համար պատճառ միշտ էլ եղել է. մարդիկ ուզում են վատություն անել, վախեցնել, լռեցնել նրան, իսկ այս միջադեպով առիթ ստեղծեցին, որպեսզի նա խառնվի իրար, սակայն ամբողջ ծրագիրը քանդվեց մի վայրկյանում։

«Դեպքը տեղի ունեացավ էկոնոմիկայի նախարարությունից փոքր-ինչ վերև։ Ես նստեցի մեքենաս, տեսա, որ հետևում մեկը կանգնած է, մտածեցի՝ կանգառի աշխատողն է, հետո նա գնաց մի քիչ ձախ, նորից եկավ մեքենայի հետևը կանգնեց, ու այդպես մի վեց–յոթ անգամ։ Այնուհետև ես ձայնային ազդանշան տվեցի, նա մոտեցավ, իրեն նայելով՝ սկսեցի կամաց ետ գնալ, պտտվեցի, որ իրեն նայեմ, այդ պահին նա սկսեց գոռալ», – նկարագրեց միջադեպը Հայկ Գևորգյանը։ 

Նրա խոսքերով՝ այն, ինչ պատմում են ոստիկանությունում, չափազանցված է։

«Այս գործը քննողները երևի ժամանակի մեքենա էին ստեղծել. ամսի քսանին հարուցված գործով ինձ ոստիկանություն են կանչում ամսի տասնյոթին», – նշեց նա։

Նա նաև տեղեկացրեց, որ ոստիկանությունում իրեն ասել են, որ հրաժարվի փաստաբանից, որպեսզի ամեն ինչ լավ լինի։