Իշխանության պատվերը արդարադատությունից ուժեղ էր. Միքայել Դանիելյան

Վռամ Բաղդասարյանի գործով վճիռն այսօր կայացել է, և Վերաքննիչ դատարանն այն թողել է անփոփոխ: Այս մասին Լուրեր.com-ի հետ զրույցում ասաց Հելսինկյան ասոցացիայի նախագահ Միքայել Դանիելյանը:

Վերքննիչ դատարանից իրենց սպասելիքները, Դանիելյանի խոսքերով, բացարձակապես չարդարացվեցին:

«Այն փաստաթղթերը, որոնք մենք ներկայացրել էինք, միանգամայն խոսում էր այն մասին, որ Վռամ Բաղդասարյանի նկատմամաբ մեղադրանքը պետք է փոխեին և սպանությունը իր վրայից հանեին: Եվ դա նույնիսկ ապացուցվեց վերաքննիչ դատարանում: Ներկայացված փաստերից դատավորները հասկացան դա, միանշանակ զգացվեց, որ իրենք հասկացան, բայց արի ու տես, որ դատախազության հրամանը կամ իշխանության պատվերը ավելի ուժեղ էր, քան արդարադատությունը Հայաստանում»,-ասաց Միքայել Դանիելյանը

Հիշեցնենք, որ Վռամ Բաղդասարյանը մեղադրվում է 2010 թվականի մայիսի 12-ին Արաբկիր համայնքում 23-ամյա Խաչիկ Մկրտչյանի սպանության մեջ, ինչի համար էլ դատապարտվել է 14 տարվա ազատազրկման: Բռամ Բաղդասարյանի գործը հասարակական հնչեղություն ստացավ այն պարզ պատճառով, որ հենց այս գործի շրջանակներում Սերժ Սարգսյանը հրապարակային անբարոյական որակեց  ՀՀ ոստիկանության քրեական հետախուզության գլխավոր վարչության նախկին պետ Հովհաննես Թամամյանին։ Այդ հայտարարությանը հետևեցին հայտնի իրադարձությունները. Թամամյանը նախ ազատվեց զբաղեցրած պաշտոնից, ապա՝ կալանավորվեց։ Հովհաննես Թամամյանն այս գործի հետ կապ ունի այնքանով, որ իբր վերջինս, օգտագործելով իր պաշտոնական դիրքը, սպանության մեջ մեղադրել էր ոչ թե Վռամ Բաղդասարյանին, այլ ՀՀԿ-ական Հովհաննես Շահինյանի քրոջ որդուն՝ Արսեն Ահարոնյանին։ Հիմա Վռամի հարազատներն ու փաստաբանները պնդում են, որ սպանություն կատարած անձը Վռամը չէ։ Ի դեպ, երբ այդ գործը քննվում էր առաջին ատյանի դատարանում, մեղադրանքը պաշտպանող Կորյուն Փիլոյանը այդպես էլ չկարողացավ հիմնավոր ապացույցներ ներկայացնել, որ սպանությունը կատարել է ոչ թե Շահինյանի քրոջ որդին, այլ՝ Վռամը։