Այս տեսքով օրինագիծը բացառիկ խոցելիություն ունի. ՀՅԴ պատգամավոր

«Այս տեսքով օրինագիծը բացառիկ խոցելիություն ունի։ Գիտենք, որ Դաշնակցությունն ընդհանրապես պառլամնտական կառավարման կողմնակից է, իսկ այս օրինագիծըշն ընդհանրապես նախագահական ինստիտուտի հզորացմանը, կենտրոնացմանն է սա տանում, որովհետև խնդրի ամբողջ օրենսդրական կարգավորումը նախագահի դաշտում է», – ՀՀ արդարադատության նախարար Հրայր Թովմասյանի ներկայացրած՝ «Արտակարգ իրավիճակի իրավական ռեժիմի մասին» օրինագծի վերաբերյալ Լուրեր.com–ի հետ զրույցում կարծիք հայտնեց ՀՅԴ խմբակցության պատգամավոր Լիլիթ Գալստյանը։

Այս օրինագծով, ըստ պատգամավորի, ԱԺ–ն դերակատարություն չունի գործընթացում, և օրենքը եթե չի արհամարհում, գոնե շրջանցում է նրկայացուցչական բարձրագույն մարմինը։ «Նախագահն ընդամենը Աժ նախագահի հետ խորհրդակցում է արտակարգ ռեժիմ ունենալու պարագայում։ Աժ լիազորություններն այս ուղղությամբ չեն սահմանվում, ընդամենը այս նախագծով ինչ–որ անորոշ մի սահմանումով ԱԺ–ն իրավունք ունի ժամկետների դադարեցման ուղղությամբ՝ այն էլ իրավական ոչ հստակ ձևակերպումներով», – նշեց Գալստյանը։

Պատգամավորը նշեց նաև մի քանի օրենսդրական բացեր, որոնք իրենց խիստ անհանգստացնում են, ինչպես օրինակ՝ արտակարգ դրության հանգամանքները, որոնք, ըստ նրա, անպայման պիտի թվարկվեն, ԱԺ–ի դերակատարության և իրավունքների, լիազորությունների մեխանիզմների սահմանումն ու նաև այն, որ արտակարգ դրության պարագայում ԶՈՒ–ի ներգրավման կետը շատ վտանգավոր և ոչ հստակ ձևակերպումներով է ներկայացված։ «Եթե մեր բոլոր այս անհանգստությունները փարատվեն, և օրենքը դառնա անխոցելի, մենք, անշուշտ, կողմ կքվեարկենք», – նշեց նա։

Իսկ այն հարցին, թե չի՞ կարծում, որ այս օրինագծի ընդունումը կարող հանգեցնել մարտի 1–ի սցենարի կրկնմանը, երբ բանակը օգտագործվեց ժողովրդի դեմ, վերջինս պատասխանեց. «Մենք խորը անհանգստություն ունենք զինված ուժերը քաղաքականացնելու առումով, այն գործիք չդարձնելու անհանգստություն ունենք»։

Իսկ օրինագծի հակասահմանադրական լինելու մասին պնդումների վերաբերյալ Լիլիթ Գալստյանն ասաց, որ «օրինագիծը ինքը սահմանադրական է, որովհետև Սահմանադրության 55–րդ հոդվածը՝ 2005–ին ընդունված բարեփոխված Սահմանադրության, ասում է, որ արտակարգ դրության իրավական ռեժիմը պետք է սահմանվի օրենքով»։ Բացի դրանից, պատգամավորը կարծում է, որ չնայած այս քայլը կարելի է դիտարկել նախընտրական զարգացումների կոնտեքստում, բայց «ավելի լավ է ունենալ օրենք և փորձել այդ օրենքով կարգավորել, քան թե չունենալ օրենք»։

Հիշեցնենք, որ ՀՀ Սահմանադրության 8.2. հոդվածի համաձայն՝ Հայաստանի Հանրապետության զինված ուժերն ապահովում են Հայաստանի Հանրապետության անվտանգությունը, պաշտպանությունը և տարածքային ամբողջականությունը, նրա սահմանների անձեռնմխելիությունը։ Զինված ուժերը քաղաքական հարցերում պահպանում են չեզոքություն և գտնվում են քաղաքացիական վերահսկողության ներքո։