Սպանության մեջ մեղադրվողը դատապարտվել է 14 տարվա ազատազրկման

ՀՀ քրեական վերաքննիչ դատարանը 2012թ. փետրվարի 8-ի որոշմամբ չի բավարարել Վռամ Բաղդասարյանի պաշտպանի ներկայացրած վերաքննիչ բողոքը եւ ուժի մեջ է թողել Երեւան քաղաքի Արաբկիր եւ Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանի` 2011թ. նոյեմբերի 16-ի դատավճիռը: Այս մասին ասված է ՀՀ դատախազության պաշտոնական կայքում տեղադրված հայտարարությունում:

Դատարանը հիմնավորված է համարել թվով 5 անձանց կողմից խուլիգանություն կատարելու, իսկ մեկի՝ Վ. Բաղդասարյանի կողմից նաեւ սպանություն կատարելու եւ ապօրինի կերպով զենք կրելու համար առաջադրված մեղադրանքները եւ դատապարտել ազատազրկման:

Մասնավորապես՝ դատավճռի համաձայն՝ Վ. Բաղդասարյանը 2010թ. մայիսի 12-ին վիճաբանել է Խ. Մկրտչյանի ընկերոջ՝ Դ. Սանդալջյանի հետ, ով հաշվեհարդար տեսնելու դիտավորությամբ սպառնացել է Վ. Բաղդասարյանին եւ բացահայտ հայտնել. «Դու մեռար»: Այնուհետեւ Դ. Սանդալջյանը դիմել է իր եղբորը՝ Հ. Սանդալջյանին եւ իր ընկեր Խ. Մկրտչյանին, որպեսզի նրանք հաշվեհարդար տեսնեն Վ. Բաղդասարյանի հետ:

Սկսված վիճաբանությունը շարունակելու նպատակով նույն օրը՝ ժամը 22:30-ի սահմաններում, իր ընկերների՝ Պ. Գրիգորյանի, Ա. Ահարոնյանի, Հ. Հակոբյանի հետ Վ. Բաղդասարյանը Երեւան քաղաքի Կոմիտասի պողոտայի 17-րդ եւ 19-րդ շենքերի մոտ հանդիպել է Խ. Մկրտչյանին եւ վերջինիս ընկերներ Հ. Սանդալջյանին եւ Ա. Փոխարյանին: Սկսվել է վիճաբանություն, ծեծկռտուք:

Վիճաբանության ընթացքում Վ. Բաղդասարյանն օգտագործել է ապօրինի կերպով ձեռք բերված, պահված եւ կրած, հրազեն հանդիսացող, գործարանային արտադրության «ՊՄ» տեսակի ատրճանակ, որով էլ կրակոցներ է արձակել Խ. Մկրտչյանի ուղղությամբ: Արդյունքում՝ Խ. Մկրտչյանը կոնքի շրջանում ստացել է հրազենային, գնդակային, թափանցող, կույր վնասվածք եւ մահացել:

Երեւան քաղաքի Արաբկիր եւ Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանի՝ 2011թ. նոյեմբերի 16-ի դատավճռով Վ. Բաղդասարյանը հանցավոր է ճանաչվել ՀՀ քրեական օրենսգրքի 104-րդ հոդվածի 2-րդ մասի 6-րդ, 10-րդ կետերով, 235-րդ հոդվածի 1-ին եւ 258-րդ հոդվածի 4-րդ մասերով եւ դատապարտել ազատազրկման՝ 14 տարի ժամկետով,
Ա. Ահարոնյանը, Ա. Փոխարյանը եւ Հ. Սանդալջյանը մեղավոր են ճանաչվել ՀՀ քրեական օրենսգրքի 258-րդ հոդվածի 4-րդ մասով եւ դատապարտվել ազատազրկման՝ 5 տարի ժամկետով,
Պ. Գրիգորյանը մեղավոր է ճանաչվել ՀՀ քրեական օրենսգրքի 258-րդ հոդվածի 3-րդ մասով եւ դատապարտվել ազատազրկման՝ 3 տարի ժամկետով, սակայն ՀՀ Ազգային Ժողովի՝ 2011թ. մայիսի 26-ի «Անկախության հռչակման 20-րդ տարեդարձի կապակցությամբ համաներում հայտարարելու մասին» որոշման 1-ին կետի 1-ին ենթակետի կիրառմամբ նա ազատվել է պատժի կրումից,
Դ. Սանդալջյանը մեղավոր է ճանաչվել ՀՀ քրեական օրենսգրքի 137-րդ հոդվածի 1-ին մասով եւ դատապարտվել ազատազրկման 2 տարի ժամկետով: Սակայն ՀՀ Ազգային Ժողովի՝ 2011թ. մայիսի 26-ի «Անկախության հռչակման 20-րդ տարեդարձի կապակցությամբ համաներում հայտարարելու մասին» որոշման 1-ին կետի 1-ին ենթակետի կիրառմամբ նա ազատվել է պատժի կրումից: