Բանակի ներգրավումը երկրի ներքին կյանքին ավելորդ եմ համարում. Վահան Շիրխանյան

«Հայաստանի ներքին զորքերը, անվտանգության ուժերը լիովին բավարար են երկրում կայունությունը պահպանելու համար, և բանակի ներգրավումը երկրի ներքին կյանքին ավելորդ եմ համարում », – «Արտակարգ դրության իրավական ռեժիմի մասին» կառավարության ներկայացրած օրինագծի վերաբերյալ այսօր լրագրողների հետ կայացած հանդիպմանը կարծիք հայտնեց ՀՀ ՊՆ նախկին փոխնախարար, ՍԴՀԿ անդամ Վահան Շիրխանյանը։

Ըստ նրա՝ արտակարգ իրավիճակներում, ընդհակառակը, զորքը չպետք է դրվի գործածության մեջ, այլ ավելի զգոն լինի արտաքին թշնամու նկատմամբ։ Իսկ այն հարցին, թե ինչու է կառավարությունը ներկայացրել այս օրինագիծը, Շիրխանյանը պատասխանեց, որ այդ հարցին չի կարող պատասխանել և այն պետք է ուղղել կառավարությանը։ Նա չի կարծում, որ դա ևս մի քայլ է՝ ուղղված նոր «մարտի 1»-ի համար հող նախապատրաստելուն։

«Խորհրդարական ընտրություններ են առջևում, նախագահական ընտրություներ չեն։ Այստեղ կարծիքների բախումը շատ ավելի մեղմ է, քան նախագահական ընտրությունների ժամանակ», – իր կարծիքը հիմնավորեց Շիրխանյանը։ Նրա համոզմամբ՝ արտակարգ դրության մասին օրենք երկիրն, այնուամենայնիվ, պարտադիր պետք է ունենա։ 

«Հայաստանը կարող է արտակարգ դրության մեջ հայտվել երկու դեպքում. սոցիալական ընդվզումների կամ այն դեպքում, եթե ղարաբաղյան խնդրում լինի ոչ հայանպաստ լուծում, բայց Ղարաբաղի դեպքում ոչ թե արտկարգ դրություն պետք է մտցվի, այլ՝ ռազմական։ Մնում է միայն սոցալական պահը։ Սոցիալական ընդվզումն էլ կարելի է կանխել լավ աշխատելով։ Եվ այդ արտակարգ դրության մասին օրենքը կմնա չօգտագործված», – նշեց նա՝ մանրամասնելով, որ իր ցանկությունն այն է, որ օրենքը լինի, բայց երբեք չկիրառվի։