Դատավարությունը շարունակվում է

Այսօր Կենտրոն և Նորք-Մարաշ վարչական շրջանների ընդհանուր իրավասության դատարանի դատավոր Գագիկ Պողոսյանի նախագահությամբ շարունակվեց Հայ ազգային կոնգրեսի ակտիվիստներ Սարգիս Գևորգյանի, Արտակ Կարապետյանի, Դավիթ Քիրամիջյանի, Տիգրան Առաքելյանի գործով դատաքննությունը: Հիշեցնենք, որ նրանք բերման են ենթարկվել օգոստոսին 9-ին, Կարապի լճի մոտ ոստիկանների հետ տեղի ունեցած միջադեպի հետևանքով: Քրգործը դատարան էր ուղարկվել նոյեմբերի 14-ին: Նրանցից կալանքի տակ է գտնվում միայն Տիգրան Առաքելյանը, մյուսներն ազատ էին արձակել չբացակայելու ստորագրությամբ: Տիգրանին մեղադրանք է առաջադրվել ՀՀ Քրօր.-ի 316-րդ հոդվածի (իշխանության ներկայացուցչին դիմադրելը) և Քրօր-ի 225-րդ հոդվածի (խուլիգանություն) հատկանիշներով:

Հայ ազգային կոնգրեսի ակտիվիստ «ամբաստանյալների» և նրանց պաշտպանների հարցերի ճնշմանն այս անգամ էլ չդիմացավ «տուժող» Հայկ Նաջարյանը: Տիգրան Առաքելյանի այն հարցին, թե ինչպես նա կբնութագրեր իրավիճակը օգոստոսի 9-ին, երբ ինքը նոր էր եկել դեպքի վայր, «տուժողը» պատասխանեց. «Երբ եկա քաշքշում էիք իրար, ես էլ ասեցի մի հատ հանգստացեք տենանք ինչ ա լինում», երբ Տիգրան Առաքելյանը խնդրեց մեկնաբանել «իրար» արտահայտությունը, և թե ինչի էր հանգստացնում ոստիկաններին, շփոթված Հայկը պատասխանեց «իրար չէ, ուզում էի ասեի դու քաշքշում էիր ոստիկանին, իսկ ասացի հանգստացեք՝ բոլորին, ոչ թե հենց կոնկրետ ոստիկաններին, կամ ձեզ անհատական»:

Դատական նիստի ընթացքում հնչեցված հարցերին «տուժողը» տալիս էր շփոթված պատասխաններ: Բայց ամբողջ ընթացքից պարզ էր միայն այն, որը տեսել ու լսել էր միայն «ամբաստանյալների» հարվածելն ու հայհոյելը: Այ թե այդ ընթացքում ինչ էին անում ոստիկանները, «տուժողը» պնդեց, որ չի նկատել, բայց և հաստատեց, որ իր գործընկերները միանշանակ գործել են օրենքի սահմաններում: