Բժշկական կենտրոնի տնօրենը մեղադրվում է մասնագիտական պարտականությունները չկատարելու եւ պաշտոնեական անփութության մեջ

Արմավիրի մարզի ընդհանուր իրավասության առաջին ատյանի դատարանում 2012թ. փետրվարի 16-ին կսկսվի «Արմավիր ԲԿ» ՓԲԸ-ի տնօրեն Ն. Գեւորգյանի վերաբերյալ քրեական գործի դատավարությունը:

Հիշեցնենք, որ մինչդատական վարույթում ձեռք բերված ապացույցների հիման վրա Ն. Գեւորգյանին մեղադրանք է առաջադրվել ՀՀ քրեական օրենսգրքի 130 հոդվածի 2-րդ մասով (Բժշկական օգնություն եւ սպասարկում իրականացնողի կողմից մասնագիտական պարտականությունները չկատարելը) եւ ՀՀ քրեական օրենսգրքի 315 հոդվածի 2-րդ մասով (Պաշտոնեական անփութություն):

Նախաքննության օրինականության նկատմամբ հսկողություն իրականացնող դատախազը հաստատել է մեղադրական եզրակացությունը եւ քրեական գործը մեղադրական եզրակացությամբ ուղարկել Արմավիրի մարզի ընդհանուր իրավասության առաջին ատյանի դատարան՝ ըստ էության քննելու համար:

Հաշվի առնելով հանրության հետաքրքրությունը հիշյալ քրեական գործի նկատմամբ՝ տեղեկացնում ենք, որ 2010-2011թթ. թվով 3 քաղաքացիների մահվան դեպքերի առթիվ հարուցված քրեական գործի նախաքննությամբ «Արմավիր ԲԿ» ՓԲԸ-ում հայտնաբերված խախտումների վերաբերյալ Արմավիրի մարզի դատախազությունը միջնորդագիր է ներկայացրել Արմավիրի մարզպետին՝ առաջարկելով միջոցներ ձեռնարկել արձանագրված իրավախախտումները բացառելու համար: