Լևոն Զուրաբյանը հավանական չի համարում ՏԻՄ ընտրությունների արդյունքների անվավեր ճանաչման պահանջի կատարումը

Հայ ազգային կոնգրեսը պահանջել է անվավեր ճանաչել 39 համայնքի ղեկավարների ընտրությունների արդյունքները։ Որքա՞ն հավանական է , որ այդ պահանջը կիրականացվի, եւ արդյո՞ք, այնուամենայնիվ, Հրազդանի ընտրությունների արդյունքները կբողոքարկվեն։ «Չորրորդ ինքնիշխանություն» թերթի այս հարցին ի պատասխան Հայ ազգային կոնգրեսի համակարգող Լևոն Զուրաբյանն ասել է, որ իրենք բացարձակապես հավանական չեն համարում այդ պահանջի կատարումը։ 

«Բայց մենք պարտավոր ենք անօրինակությունների մասին խոսել եւ պահանջել դրանց վերացումը։ Իսկ կոնկրետ Հրազդանի մասով կարծում եմ' կան բոլոր հիմքերը բողոքարկման համար։ Ամենակարեւորը' խախտվել է ԸՕ-ի 66 հոդվածի 4-րդ մասի պահանջը։ Կան բազմաթիվ տեսանյութեր, որոնք ապացուցում են ընտրակաշառքի զանգվածային բաժանումը։ Կան բազմաթիվ ապացույցներ, որ տեղի են ունեցել անձնագրային հաշվառման եւ ընտրացուցակների ուռճացման հետ կապված մանիպուլյացիաներ։ Հաշվի առնելով այդ ամենը, կարծում եմ' բողոքարկումը ճիշտ կլիներ։ Մյուս կողմից, դա թեկնածուի իրավասության եւ որոշման խնդիրն է։ Ես հասկանում եմ, որ ինչ-որ իմաստով այդ բողոքարկումը արդեն իմաստազրկված է։ Չմոռանանք, որ Սասուն Միքայելյանն արդեն դիմել է վարչական դատարան' դրոշմակնքման հարցով, եւ վարչական դատարանը անհեթեթ հղումներ կատարելով անցումային դրույթների վրա' մերժել է հայցը։ Նման պայմաններում, երբ վարչական դատարանն արդեն իրեն ցուցադրել է որպես Սերժ Սարգսյանի ռեժիմի ծախու եւ հլու-հնազանդ կամակատար, ի՞նչ իմաստ ունի այդ վարչական դատարանին դիմելը։ Բայց կարծում եմ, որ թեկնածուն պետք է կշռի բոլոր կողմ եւ դեմ փաստարկները եւ ճիշտ որոշում ընդունի այս հարցում»։