ՄԱԿ-ի գլխավոր քարտուղարը ցնցված է Կիևում բռնությունների սաստկացումից

ՄԱԿ-ի գլխավոր քարտուղար Պան Գի Մունը ցնցված է Կիևում բռնությունների սաստկացումից: Այդ մասին հայտարարել է նրա պաշտոնական ներկայացուցիչ Մարտին Նեսիրկին:

Կիևում լայնածավալ փողոցային անկարգությունները վերսկսվել են փետրվարի 18-ին՝ Գերագույն ռադայի նիստի օրը, որտեղ ընդդիմությունը պահանջում էր վերադարձնել կառավարման խորհրդարանական-նախագահական ձևը՝ վերականգնելով 2004 թվականի սահմանադրությունը: Ոստիկանության տվյալներով՝ ընդդիմադիրներն առաջին անգամ հրազեն են կիրառել: Ըստ վերջին տվյալների՝ տուժել է գրեթե 300 իրավապահ, զոհվել յոթ ոստիկան:

«Գլխավոր քարտուղարը ցնցված է և խորապես մտահոգված Ուկրաինայի մայրաքաղաք Կիևում բռնության սաստկացումից, որը հանգեցրել է նոր զոհերի ու վիրավորների: Գլխավոր քարտուղարը կոչ է անում կողմերին կրկնապատկել դրական միջոցների ձեռնարկմանն ուղղված ջանքերը, ներառյալ բողոքի ակցիաների հետևանքով ձերբակալվածների համաներումը և ցուցարարների կողմից կառավարական շենքերի ազատումը»,-ասված է Նեսիրկիի հայտարարության մեջ, որը տարածվել է փետրվարի 18-ի երեկոյան:

Նեսիրկիի խոսքով՝ ՄԱԿ-ի գլխավոր քարտուղարը կոչ է անում «անհապաղ վերսկսել արագ արդյունքների տանող երկխոսությունը»: «Հետագա անկայունության և արյունահեղության կանխումը առաջնահերթ կարևորություն ունի, և բոլոր կողմերը պետք է ձգտեն հնարավորինս արագ Ուկրաինան վերադարձնել բարգավաճման և ժողովրդավարության ուղի»,-նշվում է հայտարարության մեջ: