Ռուսաստանն ավելացրել է ադրբեջանական նավթի փոխադրման ծախսերը

Ադրբեջանի պետական նավթային ընկերությունը (SOCAR) և ռուսաստանյան «Տրանսնեֆտը» Բաքու-Նովոռոսիյսկ խողովակաշարով նավթի փոխադրման վերաբերյալ փետրվարի 18-ին նոր փոխշահավետ կոմերցիոն պայմանների հիման վրա համաձայնագիր են ստորագրել: Այս մասին հայտնել է Caspian Barrel-ը' հղում կատարելով SOCAR-ի աղբյուրներին:

Նշվում է, որ նոր համաձայնագրով Ռուսաստանն ավելացրել է ադրբեջանական նավթի փոխադրման ծախսերը, մանրամասները դեռևս չեն բացահայտվում: 2007 թ. մինչև այժմ «Տրանսնեֆտն» ադրբեջանական նավթը Ռուսաստանի տարածքով փոխադրում էր մեկ տոննան 15,67 ԱՄՆ դոլարով: Որոշ ժամանակ առաջ Ռուսաստանը հայտարարել էր, որ մտադիր է 2 անգամ ավելացնել փոխադրման սակագինը: SOCAR-ը նոր տարիֆների մասին տեղեկություն չի հայտնում:

Նոր համաձայնագիր ստորագրելուց մեկ օր առաջ ևս SOCAR-ը հայտարարել էր, որ հրաժարվում է նավթ փոխադրել Բաքու-Նովոռոսիյսկ խողովակաշարով և այսուհետև իր նավթը փոխադրելու է միայն Բաքու-Թբիլիսի-Ջեյհան խողովակաշարով: Ադրբեջանի պետական նավթային ընկերության կողմից որոշումը նման արագությամբ փոփոխելու պատճառները հայտնի չեն:

Ռուսաստանի Դաշնության և Ադրբեջանի միջև Բաքու-Նովոռոսիյսկ խողովակաշարով նավթի փոխադրման վերաբերյալ 1996թ. հունվարի 18-ին ստորագրված միջկառավարական պայմանագրի ժամկետն ավարտվել էր փետրվարի 14-ին: Փորձագետները նշում են, որ Ռուսաստանի կողմից նավթի փոխադրման ծախսերը երկու անգամ բարձրացնելը չեն համապատասխանում Ադրբեջանի տնտեսական շահերին: