Լավրովն Իրաքում կքննարկի երկու երկրների համագործակցության հարցեր

Ռուսաստանի Արտաքին գործերի նախարար Սերգեյ Լավրովը փետրվարի 20-ին գործնական այցելությամբ մեկնել է Իրաք՝ հանդիպելու Իրաքի վարչապետ Նուրի ալ Մալիքիի և արտգործնախարար Հուշիյար Զիբարիի հետ:

Ինչպես հաղորդում են արաբական լրատվամիջոցները, Սերգեյ Լավրովը հայտարարել է, որ Բաղդադում կայանալիք հանդիպումների ընթացքում կքննարկվեն ռուս-իրաքյան համագործակցության վերաբերյալ հարցեր, մասնավորապես' քաղաքական, առևտրական, տնտեսական ոլորտներում: Նա նաև ավելացրել է, որ կքննարկվեն երկկողմ մեծ ծրագրեր նավթի, գազի, էլեկտրաէներգիայի ոլորտներում:

Նախատեսված է, որ Լավրովը և իրաքյան գործընկերները կփոխանակվեն կարծիքներով միջազգային և տարածաշրջանային կարևորագույն հարցերի շուրջ, այդ թվում նաև Սիրիայի վերաբերյալ:

Ավելի վաղ Ռուսաստանի արտգործնախարարը երկօրյա այցով մեկնել էր Քուվեյթ՝ մասնակցելու Պարսից ծոցի արաբական երկրների համագործակցության խորհրդի ֆորումին: