Ամերիկացիների մեծամասնության կարծիքով՝ աշխարհի ղեկավարները չեն հարգում Օբամային

ԱՄՆ-ի քաղաքացիների կեսից ավելին համոզված է, որ աշխարհի ղեկավարները չեն հարգում Բարաք Օբամային: Այդ մասին հայտնում են Gallup ընկերության կողմից անցկացված սոցհարցման հարցման տվյալները:

Նման տեսակետ է հայտնել հարցման մասնակիցների 53 տոկոսը, հակառակ կարծիքին է 41 տոկոսը: Ինչպես նշվում է Gallup-ի հաղորդագրության մեջ, նման տվյալներ առաջին անգամ են ստացվել իշխանության գլուխ Օբամայի գտնվելու ողջ ժամանակաշրջանում: 2010-ից մինչև 2013 թվականներն Օբամայի նկատմամբ հարգանքը հավաստող ամերիկացիների թվաքանակը գերազանցել է 50 տոկոսը:

Կտրուկ անկում է տեղի ունեցել միայն վերջին մի քանի ամսվա ընթացքում: Հետազոտության հեղինակները դա կապում են արտաքին քաղաքական ասպարեզում Օբամայի մի շարք անհաջողությունների հետ: Դրանց թվում նշվում են ամերիկյան հատուկ ծառայությունների համատարած լրտեսման, աշխարհի ղեկավարների բանակցությունների գաղտնալսման ծրագրերի մերկացումները, Սիրիայի շուրջ ստեղծված իրադրությունը, Ռուսաստանի հետ լարված հարաբերությունները և Իսրայելի վարչապետ Բենիամին Նաթանյահուի հետ Օբամայի չկարգավորվող հարաբերությունները:

Gallup-ի հարցմանը, որն անցկացվել է փետրվարի 6-9-ը, մասնակցել են 18-ից բարձր տարիքի 1023 ամերիկացի: