ԱՄՆ-ն, Չինաստանը և Ռուսաստանն աշխարհի առաջատարներն են` դոլարային միլիարդատերերի թվով

Չինաստանում այժմ կա 358 դոլարային միլիարդատեր, և այդ ցուցանիշով նա զիջում է միայն ԱՄՆ-ին : Երրորդ տեղում Ռուսաստանն է, որին հաջորդում են Մեծ Բրիտանիան և Հնդկաստանը: Այդ մասին վկայում են այն հետազոտության հրապարակված արդյունքները, որն անցկացրել է չինական «Խուժուն» հանդեսը (Forbes-ի անալոգը):

Հրատարակության տվյալներով՝ ներկայում ամբողջ աշխարհում գրանցված է 1867 միլիարդատեր՝ 414-ով ավելի, քան մեկ տարի առաջ: Նրանց միագումար կարողությունը հասել է 6,9 տրիլիոն դոլարի: Դա գերազանցում է Ճապոնիայի՝ մոլորակի երրորդ տնտեսական տերության տարեկան համախառն ներքին արդյունքը, նշվում է զեկույցում:

«Ամերիկյան տնտեսության վերականգնումը և IT-տեխնոլոգիաների շուկայի բումը միլիարդատերերի թվաքանակը հասցրել է ռեկորդային մակարդակի»,-արձանագրել է «Խուժունի» հետազոտության գլխավոր կազմակերպիչ Ռուպերտ Խուգեվերֆը: Նրա խոսքով՝ տեխնոլոգիաները՝ որպես հարստության գլխավոր աղբյուր, արդեն առաջ են անցել անշարժ գույքից:

Առանձին վերցրած քաղաքների հաշվարկով Նյու Յորքը Մոսկվայից խլել է «միլիարդատերերի համաշխարհային մայրաքաղաքի» տիտղոսը: Ամերիկյան մեգապոլիսում միլիարդատերերի թիվը մեկ տարվա ընթացքում ավելացել է 14-ով և հասել 84-ի: Ցուցակի երկրորդ և երրորդ հորիզոնականներում զեկույցի հեղինակները դրել են Մոսկվան (77) և Հոնկոնգը (65), նրանց հաջորդում են Պեկինը և Լոնդոնը:

Մոլորակի ամենահարուստ մարդու տիտղոսը վերադարձրել է Microsoft-ի հիմնադիր Բիլ Գեյթսը, ում կարողությունը գնահատվում է 68 մլրդ դոլար: Վերջին երեք տարվա ընթացքում առաջին անգամ նա առաջ է անցել նախկին առաջատարից՝ հեռահաղորդակցուղիների մագնատ մեքսիկացի Կառլոս Սլիմից, որը 60 մլրդ ցուցանիշով զբաղեցրել է չորրորդ տեղը: «Խուժունի» վարկածով՝ առաջատարների եռյակում են նաև ամերիկացի ներդրող Ուորեն Բաֆետը (64 մլրդ դոլար) և իսպանացի Ամանսիո Օրտեգան (62 մլրդ դոլար), որը Zara մակնիշի հագուստի խանութների ցանցի սեփականատերն է:

Ասիայի ամենահարուստ մարդ է ճանաչվել 86-ամյա Լի Կա-շինը Հոնկոնգից. նրա կարողությունը գնահատվում է 33 մլրդ դոլար: Իսկ մայրցամաքային Չինաստանի ամենահարուստ բնակիչ Վան Ցզյանլինը՝ Dalian Wanda Group ներդրումային ընկերության սեփականատերը, մեկ տարվա ընթացքում կարողացել է կրկնակի ավելացնել իր դրամագլուխը՝ այն հասցնելով 25 մլրդ դոլարի: