Ղրղզստանը և Ղազախստանը բողոքի են ներկայացրել ՌԴ ԱԳՆ-ին Ժիրինովսկու վիրավորական հայտարարությունների համար

Ղրղզստանի և Ղազախստանի արտաքին քաղաքական գերատեսչությունները բողոքի նոտաներ են հղել ՌԴ ԱԳՆ-ին Ռուսաստանի Լիբերալ-դեմոկրատական կուսակցության առաջնորդ Վլադիմիր Ժիրինովսկու վիրավորական հայտարարությունների կապակցությամբ, որը փետրվարի 23-ի հանրահավաքում պահանջել էր Ռուսաստանին միացնել Միջին Ասիայի հանրապետությունները: Այս մասին հայտնում է itar-tass-ը:

Ղրղզստանի ԱԳՆ-ի հայտարարության մեջ ասված է, որ այդ հայտարարություններն «առնվազն խորը տարակուսանք» են առաջացնում և «չեն համապատասխանում երկու երկրների միջև ռազմավարական գործընկերության ոգուն»: «Լինելով պաշտոնատար անձ` Պետդումայի փոխխոսնակ, Վ. Ժիրինովսկին առաջին անգամը չէ, որ թույլ Է տալիս անընդունելի արտահայտություններ, որոնք վիրավորում են ղրղզ ժողովրդի ազգային զգացմունքները»,-նշվում է հայտարարության մեջ:

Դրանում ասված է, որ հանրապետության ԱԳ նախարարությունը Ռուսաստանի իշխանություններից «սկզբունային գնահատական է ակնկալում Ժիրինովսկու հայտարարությանը» և Ղրղզստանի նկատմամբ «Ռուսաստանի քաղաքականության բովանդակությանը դրա համապատասխանությանը»:

Ղազախստանի ԱԳ նախարարության հայտարարության մեջ նույնպես նշվում է, որ Ժիրինովսկին, «ով պետական բարձր պաշտոններ է զբաղեցնում, պետք Է լուրջ և պատասխանատու մոտեցում դրսևորի» իր հրապարակային հայտարարությունների նկատմամբ: Փաստաթղթում մատնանշվում է, որ նա «արդեն առաջին անգամը չէ անընդունելի արտահայտություններ թույլ տալիս մեր երկրի հասցեին»: «Մենք խնդրում ենք ռուսական կողմին՝ պաշտոնական գնահատական տալ Ղազախստանի և Ռուսաստանի միջև դաշնակցային ու ռազմավարական գործընկերության ոգուն Ժիրինովսկու ելույթի համապատասխանությանը»,-ասված է հայտարարության մեջ: