Եվրամիության բարեփոխումը կդառնա Լոնդոնում Մերկելի և Քեմերոնի բանակցությունների հիմնական թեման

Եվրամիության բարեփոխումը և Բրյուսելի հետ Լոնդոնի հարաբերությունների հնարավոր նոր սկզբունքները կդառնան Մեծ Բրիտանիայի վարչապետ Դևիդ Քեմերոնի և ԳՖՀ-ի կանցլեր Անգելա Մերկելի միջև բանակցությունների գլխավոր թեման, որը փետրվարի 27-ին այցով ժամանում է Լոնդոն:

Գերմանիայի կառավարության ղեկավարը նաև Վեստմինստերյան պալատում ելույթ կունենա խորհրդարանի զույգ պալատների առջև, ինչը Գերմանիայի կանցլերները չեն արել վերջին 28 տարում: Ընդսմին նա հրավիրված է Բուկինհեմյան պալատ՝ թեյելու Եղիսաբեթ Երկրորդ թագուհու հետ:

«Մերկելի ընդունելության լայն թափը ոչ միայն արտացոլում է այն փաստը, որ կանցլերը Եվրամիության ամենահզոր ղեկավարն է, այլև վկայում է ԵՄ-ի բարեփոխման հարցում նրան որպես գործընկեր ունենալու Քեմերոնի ձգտման մասին»,-գրում է Financial Times թերթը:

Ձգտելով պահպանել իր իշխանությունը, համենայն դեպս հերթական վարչապետական ժամկետով, Քեմերոնն անցյալ տարի հայտարարել է, որ 2015 թվականի գարնանը կայանալիք համընդհանուր ընտրություններում հաղթելու դեպքում ինքը 2017 թվականին հանրաքվե կանցկացնի Եվրամիության հետ հարաբերությունների շուրջ: «Քվեաթերթիկում հարց է լինելու ԵՄ-ից Միացյալ Թագավորության դուրս գալու մասին, սակայն Քեմերոնն այն կարծիքին է, որ դա չարժե անել, քանի որ առաջիկա ամիսներին ինքը մտադիր է հասնել Եվրամիության բարեփոխման՝ ի շահ Մեծ Բրիտանիայի և ԵՄ-ում նրա ինտեգրացման մակարդակի նվազեցման»,-նշել է Պահպանողական կուսակցության կենտրոնակայանի ներկայացուցիչը:

Ինչպես նշում է Guardian թերթը, Գերմանիայի կանցլերի սկսվող այցի ընթացքում Քեմերոնը կփորձի «միասնական դիրքորոշման» հիմք դնել Եվրամիության բարեփոխման հարցում: «Ես Մերկելով հիացած եմ բոլոր առումներով, բայց նախ և առաջ նրանով, որ նա մշտապես հաղթում է ընտրություններում»,- ավելի վաղ խորհրդարանում հայտարարել է Դևիդ Քեմերոնը: