Թաթարստանի խորհրդարանի պատվիրակությունն ուղևորվել է Ղրիմ

Թաթարստանի պետական խորհրդի պատվիրակությունը փետրվարի 27-ին ուղևորվել է Ղրիմ, որպեսզի հանդիպում ունենա ինքնավարության պատգամավորների հետ և նրանց փոխանցի ուղերձը Ղրիմի ժողովուրդներին՝ հակամարտությունների լուծման արմատական միջոցներից հրաժարվելու և տարածաշրջանում խաղաղությունը պահպանելու կոչով: Այս մասին հայտնում է ria.ru-ն:

Փետրվարի 26-ին Թաթարստանի նախագահ Ռուստամ Միննիխանովը հայտարարել է, որ հանրապետության ղեկավարությունը, Թաթարստանի պետական խորհուրդը, Թաթարների համաշխարհային կոնգրեսը կոչ են անում Ղրիմի թաթարներին՝ խաղաղություն և համաձայնություն պահպանել տեղի ռուսալեզու բնակչության հետ:

«Թաթարստանի Հանրապետության պետական խորհուրդը կոչ է անում ուկրաինացիներին, ռուսներին, Ղրիմի թաթարներին՝ Ղրիմի Ինքնավար Հանրապետության բոլոր ժողովուրդներին՝ պահպանել ազգամիջյան և միջկրոնական խաղաղությունն ու համաձայնությունը, կտրականապես հրաժարվել հակամարտության լուծման արմատական միջոցներից, իսկ Ղրիմի Ինքնավար Հանրապետության իշխանություններին՝ վճռականորեն դատապարտել ներպետական հակամարտության բոլոր մասնակիցների կողմից օգտագործվող ուժային մեթոդները»,-ասված է Թաթարստանի պետական խորհրդի ուղերձում:

Հանրապետության խորհրդարանը որոշում է ընդունել Ղրիմի Գերագույն խորհուրդ ուղարկել հինգ մարդուց բաղկացած պատվիրակություն, որում, մասնավորապես, ընդգրկվել են Թաթարստանի պետական խորհրդի մշակույթի հարցերով կոմիտեի նախագահ Ռազիլ Վալեևը և օրինականության ու իրավակարգի գծով կոմիտեի փոխղեկավար Ռաֆիլ Նուգումանովը: Պատվիրակությունն արդեն մեկնել է Ղրիմ: