«Իլհամ Ալիևին սպասում է Յանուկովիչի ճակատագիրը». Ջամիլ Հասանլի

Ադրբեջանի «Ազգային խորհուրդ» ժողովրդավարական ուժերի առաջնորդ Ջամիլ Հասանլին հայտարարել է, որ Ադրբեջանի Նախագահ Իլհամ Ալիևին սպասում է Ուկրաինայի նախագահ Վիկտոր Յանուկովիչին պատուհասած ճակատագիրը: Այս մասին Հասանլին հայտնել է Facebook-ի իր էջում` մեկնաբանելով իրադարձություններն Ուկրաինայում:

«Կիևյան Մայդանում ժողովրդի կամաարտահայտման իրադարձությունները հաջող ավարտ ունեցան, և սեփական երկրի մի ավտորիտար կառավարիչ, բռնապետ, կոռուպցիոներ և թալանիչ ևս անհաջողություն կրեց: Ուկրաինացի կոռուպցիոներների ճակատագիրը սպասում է նաև Ադրբեջանի պաշտոնատար անձանց: Յանուկովիչի կաշառակեր նախարարները անգամ չէին կարողացել մի երկիր գտնել, ուր կարող էին փախչել: Կոռուպցիոներների հաշվապահությունը դարձավ հրապարակայնության սեփականություն: Նման ճակատագիր սպասում է նաև «Ենի Ազերբայջան» կուսակցությանը, որը շատ ավելի կեղտոտ է, քան ուկրաինական Ռեգիոնների կուսակցությունը», -գրել է նա:

Ջամիլ Հասանլին համարում է, որ Ադրբեջանի պաշտոնատար անձինք շատ ավելի կոռումպացված և գազանաբարո են, քան Յանուկովիչի նախարարները: «Յանուկովիչի ճակատագիրը սպասում է նաև 2013թ. հոկտեմբերի 9-ին իշխանությունը հերթական անգամ բռնազավթած Իլհամ Ալիևին, քանի որ 4 տարի կառավարման ընթացքում Յանուկովիչը չի արել անգամ այն բաների 4 տոկոսը, ինչ արել է Իլհամ Ալիևը», -նշել է նա: