Բրյուսելում բացվում է Եվրամիության ԱԳ նախարարների արտահերթ հանդիպումը՝ նվիրված Ուկրաինայի իրադրությանը

Ինչպես հայտնում է itar-tass-ը, Բրյուսելում մարտի 3-ին տեղի կունենա ԵՄ-ի անդամ 28 երկրների ԱԳ նախարարների արտահերթ հանդիպումը՝ նվիրված Ուկրաինայի իրադրությանը: Այն անցկացնելու համար Եվրամիության արտաքին գործերի և անվտանգության քաղաքականության գերագույն ներկայացուցիչ Քեթրին Էշթոնն Ուկրաինա նախատեսված այցը մարտի 3-ից հետաձգել է մարտի 5-ին:

Եվրամիության երկրներին այդ հանդիպմանը իրենց դիրքորոշումները ձևակերպելուն օգնել է Հյուսիսատլանտյան խորհրդի՝ դեսպանների մակարդակով մարտի 2-ին կայացած վեցժամյա նիստը, խորհուրդ, որտեղ ներկայացված են ԵՄ-ի երկրների մեծամասնությունը, ինչպես նաև ԱՄՆ-ն, Կանադան և Թուրքիան:

ՆԱՏՕ-ի խորհուրդը կոչ է արել Ռուսաստանին «Ուկրաինայի որևէ մասում ձեռնպահ մնալ միջամտությունից» և «իր զորքերը վերադարձնել ռազմակայաններ»: Դաշինքը նաև կոչ է արել Ուկրաինա ուղարկել ԵԱՀԿ-ի և ՄԱԿ-ի դիտորդների և բանակցություններ սկսել կողմերի միջև:

Հայտարարության մեջ ընդգծվում է Ուկրաինայի կողմից «մարդու, ազգային փոքրամասնությունների իրավունքների հարգման շուրջ և օրենքի գերակայությանը համապատասխան քաղաքական երկխոսությունը» շարունակելու անհրաժեշտությունը:

Ուկրաինան «ՆԱՏՕ-ի կարևոր գործընկերն է», և դաշինքը լիովին պաշտպանում է «նրա անկախությունը, ինքնիշխանությունն ու տարածքային ամբողջականությունը», ընդգծել են հանդիպման մասնակիցները: