Ադրբեջանական ստի քարոզչամեքենան դուրս է եկել Ջեյմս Ուորլիքի դեմ

Պատմությունը խեղաթյուրելու ադրբեջանական կողմի ջանքերը հանգեցրել են այն բանին, որ Ադրբեջանի փոխարտգործնախարար Արազ Ազիմովը հանդես է եկել ԵԱՀԿ Մինսկի խմբի ԱՄՆ համանախագահ Ջեյմս Ուորլիքի դեմ: Այս մասին հայտնում է ադրբեջանական «ԱՊԱ» գործակալությունը:

Ազիմովը քննադատել է համանախագահին սումգայիթյան դեպքերի վերաբերյալ Twitter սոցիալական ցանցի իր միկրոբլոգում գրառման համար' մեղադրելով նրան ղարաբաղյան հակամարտությունը հավուր պատշաճի չուսումնասիրելու մեջ:

Ադրբեջանի փոխարտգործնախարարն ասել է, որ նման դեպքերի քննարկման համար Twitter-ը հարմար հարթակ չէ: «Ես չեմ կարող այս ամենը Ուորլիքին ասել Twitter-ով, քանի որ այնտեղ կարելի է հաղորդագրություն գրել ընդամենը 120 նշանով: Պարոն Ուորլիքը վերջերս է նշանակվել այս պաշտոնում և պետք է հակամարտության իրականությունը ավելի լավ ճանաչի»,-ասել է Ազիմովը:

ԵԱՀԿ Մինսկի խմբի ամերիկացի համանախագահ, դեսպան Ջեյմս Ուորլիքն Ադրբեջանի Սումգայիթ քաղաքում հայկական կոտորածների 26-րդ տարելիցի կապակցությամբ գրառում էր կատարել թվիթերյան իր էջում: «Մենք նաև հիշում ենք Սումգայիթը: Ե′վ Հայաստանը, և′ Ադրբեջանը պետք է աջակցեն մարդ-մարդ շփումներին` հանդուրժողականություն և վստահություն ձևավորելու համար»,-գրել է դիվանագետը: