Կիևում ԱՊՀ-ի երկրների ԱԳ նախարարների հանդիպումը նշանակվել է մարտի 7-ին

Ուկրաինական կողմը մարտի 7-ին ԱՊՀ-ի երկրների արտաքին գործերի նախարարների հանդիպում է նախաձեռնել Կիևում: Այս մասին հայտնում է «Ինտերֆաքս» գործակալությունը:

«ԱՊՀ-ի արտաքին գործերի նախարարների հանդիպումը նշանակված է: Այն տեղի կունենա Կիևում` ժամը 11-ից մինչև 14-ը»,-մարտի 5-ին Մինսկում կայացած ճեպազրույցում հայտնել է Բելառուսում Ուկրաինայի դեսպան Միխայիլ Եժելը:

Բացի այդ, նա հույս է հայտնել, որ մարտին Մինսկում կգումարվի բելառուսա-ուկրաինական միջկառավարական հանձնաժողովի նիստը, որը պլանավորվում էր անցկացնել դեռ անցած տարվա դեկտեմբերին, բայց հետաձգվել էր: Դիվանագետն այսպես է պատասխանել լրագրողների այն հարցին, թե պաշտոնական մակարդակով եղե՞լ են արդյոք Ուկրաինայի և Բելառուսի իշխանությունների շփումներ:

Ավելի վաղ Ուկրաինայի ԱԳ նախարարության տեղեկատվական քաղաքականության դեպարտամենտի տնօրեն Եվգենի Պերեբիյնիսը Կիևում կայացած ճեպազրույցի ժամանակ հայտնել է, որ հանրապետության արտաքին գործերի նախարարը հրավիրում է ԱՊՀ-ի երկրների ԱԳ նախարարների խորհրդի արտահերթ նիստ՝ նվիրված Ուկրաինայի իրադրությանը:

«Արտաքին գործերի նախարար Անդրեյ Դեշչիցան՝ որպես ԱՊՀ-ի ԱԳ նախարարների խորհրդի նախագահ, դիմել է ԱՊՀ-ի գործադիր կոմիտեին՝ առաջարկելով մոտ ժամանակներս անցկացնել Համագործակցության արտաքին գործերի նախարարների խորհրդի արտահերթ նիստ: Պլանավորվում է քննարկել Ուկրաինայի առանձին շրջաններում, մասնավորապես, Ղրիմում ստեղծված իրադրությունը և ընդունել համապատասխան հայտարարություն»,-նշել է նա: