Աշխարհն արտակարգ դրության շեմին է Աֆղանստանում, որտեղից դուրս են բերվում միջազգային ուժերը. Վիկտոր Իվանով

Ինչպես հայտնում է itar-tass-ը, Աֆղանստանում տարեկան արտադրվում է 150 միլիարդ միանվագ դեղաչափի հերոին: Այս մասին հայտնել է Ռուսաստանի Թմրանյութերի շրջանառության վերահսկողության համերկրային ծառայության ղեկավար Վիկտոր Իվանովը Պետական հակաթմրադեղային կոմիտեի նիստում:

«Աֆղանստանում տարեկան արտադրվում է 150 միլիարդ միանվագ դեղաչափ, ինչը քսանհինգ անգամ ավելի է Երկրագնդի բնակչության թվաքանակից՝ չխոսելով արդեն մեկ տրիլիոն միանվագ դեղաչափ կազմող երեք հազար տոննա զուտ հերոինի մասին, որը պահեստավորված է Ռուսաստանի անմիջական մերձակայքում գտնվող շտեմարաններում»,-ասել է Իվանովը:

Նրա խոսքով՝ «աշխարհն արտակարգ դրության շեմին է կանգնած Աֆղանստանում, որտեղից դուրս են բերվում այսպես կոչված Անվտանգության օժանդակման միջազգային ուժերը»:

Իվանովը հիշեցրել է, որ 2001 թվականի հոկտեմբերին «Անխորտակելի ազատություն» գործողության սկսվելու պահից ՄԱԿ-ն անաչառ կերպով Աֆղանստանում գրանցել է թմրանյութերի արտադրության պայթյունավտանգ և աղետալի աճ: Հերոինի արտադրության ծավալներն աճել են ավելի քան 40 անգամ:

«Նույն բանը վերաբերում է նաև Աֆղանստանում ափիոնի կակաչի ցանքատարածություններին: ՄԱԿ-ի Թմրանյութերի և հանցավորության դեմ պայքարի վարչության տվյալների համաձայն՝ Աֆղանստանում ափիոնի կակաչի ցանքատարածությունները միայն անցյալ տարի աճել են 150 հազար հեկտարով՝ մինչև 209 հազար հեկտար, այսինքն՝ 36 տոկոսով»,-եզրափակել է Թմրանյութերի շրջանառության վերահսկողության համերկրային ծառայության ղեկավարը: