Քըրքորյանը Forbes-ի ամենատարեց միլիարդատերերից երկրորդն է

Forbes ամսագիրը հրապարակել է աշխարհի միլիարդատերերի ամենամյա ցանկը, ուր ընդգրկված հայ միլիարդատերերի շարքը գլխավորում է ամերիկահայ գործարար և բարերար Քըրք Քըրքորյանը (328-րդ հորիզոնական): Ամսագիրը նրա կարողությունը գնահատել է 4.5 միլիարդ ԱՄՆ դոլար: Forbes վարկանիշային ցուցակում հայտնվել են ևս հինգ հայ մեծահարուստներ' Սամվել Կարապետյանը (345-րդ հորիզոնական), Դանիլ Խաչատուրովը (663-րդ հորիզոնական), Էդուարդո Էռնեկյան (931-րդ հորիզոնական), ԱՄՆ-ում Հայաստանի գլխավոր հյուպատոս Սերգեյ Սարկիսովը և նրա եղբայր Նիկոլայ Սարկիսովը, ովքեր զբաղեցրել են 1465-րդ հորիզոնականը:

Ըստ ամսագրի' աշխարհի միլիարդատերերի վարկանիշը շարունակում է նոր բարձունքներ նվաճել' ընդգրկելով աշխարհի նորանոր անկյուններ: Բացահայտել են 1,645 միլիարդատերերի, ում ունեցվածքի համախառն զուտ արժեքը կազմում է 6,4 տրլն դոլար' նախորդ տարվա 5.4 տրիլիոնի համեմատ: Ավելացել է նաև կին միլիարդատերերի թիվը. այս տարի ցանկում ընդգրկվել են 172 կանայք' նախորդ տարվա 138-ի համեմատ: Աշխարհի միլիարդատերերի առաջին հինգյակը կազմում են Բիլ Գեյթսը' 76 միլիարդ դոլարով, մեքսիկացի գործարար Կառլոս Սլիմ Հելուն' 72 միլիարդ դոլարով, ով անցյալ տարին առաջինն էր ցանկում, հագուստի վերավաճառքով զբաղվող իսպանացի գործարար Ամանսիո Օրտեգան' 64 միլիարդ դոլարով, որ հայտնի է իրեն պատկանող «Զառա» նորաձևության խանութների ցանցով, Ուորեն Բաֆեթը' 58.2 միլիարդ դոլարով և Լարրի Էլիսոնը' 48 միլիարդ դոլարով:

Հյուրանոցային բիզնեսի մագնատ Քըրք Քըրքորյանը 96 տարեկանում էլ դեռ շարունակում է գումար վաստակել: Թեև վերջին տարիներին նա վաճառել էր MGM International Resorts-ի 750 միլիոն դոլար արժողությամբ իրեն պատկանող բաժնեմասերը, սակայն շարունակում է տնօրինել բաժնեմասերի մեկ հինգերորդը, որի կարողությունն անցած տարում համարյա կրկնապակել էր զուտ արժեքը' հասնելով 1.2 միլիարդ դոլարի: Քըրքորյանը Forbes-ի ամենատարեց միլիարդատերերից երկրորդն է: Ամենատարեց միլիարդատերը 98 տարեկան է: