Մոսկվան տեխնիկապես հնարավոր չի համարում մարտի 7-ին Կիևում ԱՊՀ-ի ԱԳ նախարարների խորհրդի նիստ գումարելը

Մարտի 7-ին Կիևում ԱՊՀ-ի երկրների արտաքին գործերի նախարարների խորհրդի նիստ գումարելը տեխնիկապես հնարավոր չէ: Այդ մասին մարտի 6-ին լրագրողներին հայտարարել է Ռուսաստանի ԱԳ փոխնախար Վասիլի Նեբենզյան: Այս մասին հայտնում է itar-tass-ը:

«Վաղը հավաքվելը նույնիսկ տեխնիկապես հնարավոր չէ,- նշել է նա:-Ոչ միայն մեր նախարարը, այլև ԱՊՀ-ից նրա գործընկերներից շատերն իրենց պլաններն ունեն, որոնք այդ ամսաթվին չեն հարմարվում, բայց մենք երկխոսությունից չենք հրաժարվում»:

Փոխնախարարն ասել է, թե Մոսկվայում չեն բացառում մինչև ապրիլի 4-ին Մոսկվայում ԱՊՀ-ի ԱԳ նախարարների խորհրդի հերթական նիստը ԱՊՀ-ի, ներառյալ Ուկրաինայի գործընկերների հետ հանդիպում անցկացնելը:

Ինչպես արդեն հաղորդվել է, ուկրաինական կողմը մարտի 7-ին ԱՊՀ-ի երկրների արտաքին գործերի նախարարների հանդիպում է նախաձեռնել Կիևում: «ԱՊՀ-ի արտաքին գործերի նախարարների հանդիպումը նշանակված է: Այն տեղի կունենա Կիևում ժամը 11-ից մինչև 14-ը»,-մարտի 5-ին Մինսկում կայացած ճեպազրույցում հայտնել է Բելառուսում Ուկրաինայի դեսպան Միխայիլ Եժելը:

Ավելի վաղ Ուկրաինայի ԱԳ նախարարության տեղեկատվական քաղաքականության դեպարտամենտի տնօրեն Եվգենի Պերեբիյնիսը Կիևում կայացած ճեպազրույցի ժամանակ հայտնել է, որ հանրապետության արտաքին գործերի նախարարը հրավիրում է ԱՊՀ-ի երկրների ԱԳ նախարարների խորհրդի արտահերթ նիստ՝ նվիրված Ուկրաինայի իրադրությանը:

«Պլանավորվում է քննարկել Ուկրաինայի առանձին շրջաններում, մասնավորապես, Ղրիմում ստեղծված իրադրությունը և ընդունել համապատասխան հայտարարություն»,- նշել է նա: