ԵԱՀԿ-ի 21 երկրների զինվորական դիտորդները Օդեսայից ավտոբուսով մեկնել են Ղրիմ

Ինչպես հայտնում է itar-tass-ը, Եվրոպայի անվտանգության և համագործակցության կազմակերպության մեջ մտնող 21 երկրների զինվորական դիտորդներն Օդեսայից ավտոբուսով մեկնել են Ղրիմ: Այդ հաղորդել է կազմակերպության մամուլի ծառայությունը: Լիտվայի ԱԳ նախարարության տվյալներով` նախօրյակին նրանց չէր հաջողվել հասնել թերակղզի:

Փորձագետների խումբը ձևավորվել էր այն բանից հետո, երբ Ուկրաինան համապատասխան հրավերներ էր ուղարկել ԵԱՀԿ-ի գործընկերներին: Այդ հրավերին արձագանքել է 21 պետություն: Ընդամենն Ուկրաինա են ուղևորվել 40 դիտորդ, ինչպես նաև ԵԱՀԿ-ի հակամարտությունների կանխման կենտրոնի մի աշխատակից:

Ինչպես ավելի վաղ տեղեկացրել է կազմակերպության մամուլի ծառայությունը, իրենց դիտորդներին ուղարկելու որոշում են ընդունել Մեծ Բրիտանիան, Հունգարիան, Գերմանիան, Դանիան, Իռլանդիան, Կանադան, Լատվիան, Լիտվան, Նորվեգիան, Լեհաստանը, Սլովակիան, Թուրքիան, ԱՄՆ-ը, Ֆինլանդիան, Ֆրանսիան, Չեխիան, Շվեդիան և Էստոնիան: Ավելի ուշ նրանց են միացել Ավստրիան, Իսլանդիան և Իտալիան:

Մինչդեռ այսօր Ղրիմի Ինքնավար Հանրապետության նախարարների կաբինետի մամուլի ծառայությունից հաղորդել են, որ Ղրիմի Գերագույն խորհրդի պատվիրակության այցը Մոսկվա, որը պետք է մարտի 6-ին սկսվեր խոսնակ Վլադիմիր Կոնստանտինովի գլխավորությամբ, հետաձգվել է:

«Այցը հետաձգվել է Գերագույն խորհրդի արտահերթ նիստի անցկացման կապակցությամբ»,-գործակալությանն ասել է զրուցակիցը՝ չճշտելով այցի նոր ժամկետները: Մոսկվայում Ղրիմի պատվիրակությունը պետք է հանդիպում ունենար Ռուսաստանի խորհրդարանի ներկայացուցիչների հետ: