Մոսկվան չի կարող անտեսել Ուկրաինայից իրեն ուղղված օգնության կոչերը. Պուտին

ՌԴ նախագահ Վլադիմիր Պուտինն ԱՄՆ-ի իր պաշտոնակից Բարաք Օբամայի հետ հեռախոսազրույցի ընթացքում, որը կայացել է ամերիկյան կողմի նախաձեռնությամբ, քննարկել է Ուկրաինայում ստեղծված «սուր իրադրությունը»: Այդ մասին հաղորդել է Կրեմլի մամուլի ծառայությունը: Նշվում է, որ բանավեճի ընթացքում դրսևորվել են տարբերությունները ներկայիս ճգնաժամի ծագման պատճառների և ընթացիկ իրադրության գնահատականներում և մոտեցումներում:

Պուտինը, մասնավորապես, նշել է, որ հակասահմանադրական հեղաշրջման արդյունքում իշխանության եկած և համազգային մանդատ չունեցող Ուկաինայի ներկայիս ղեկավարությունը բացարձակապես անօրինական որոշումներ է պարտադրում արևելյան և հարավարևելյան տարածաշրջաններին ու Ղրիմին:

Ռուսական պետության ղեկավարի խոսքով՝ Մոսկվան չի կարող անտեսել այդ կապակցությամբ իրեն ուղղված օգնության կոչերը և գործում է ադեկվատ, միջազգային իրավունքի նորմերին լիովին համապատասխան:

Պուտինը նաև ընդգծել է ռուս-ամերիկյան հարաբերությունների առաջնահերթ կարևորություն ունեն աշխարհում կայունության ու անվտանգության ապահովման համար: «Այդ հարաբերությունները չպետք է զոհաբերվեն առանձին, թող որ հույժ նշանակալի միջազգային հիմնախնդիրների շուրջ առկա տարաձայնություններին»,-նախագահի խոսքը մեջբերել է Կրեմլի մամուլի ծառայությունը:

Իր հերթին, ինչպես հաղորդել է Սպիտակ տունը, Բարաք Օբաման մեկ ժամ տևած հեռախոսազրույցի ընթացքում հայտարարել է, որ Ուկրաինայի իրադրությունը կարելի է կարգավորել դիվանագիտական ճանապարհով: Նա այն կարծիքին է, որ դրա համար Կիևը և Մոսկվան պետք է «ուղղակի բանակցություններ վարեն միջազգային հանրակցության միջնորդությամբ»: Օբաման նաև կարևորել է Ուկրաինա, մասնավորապես, Ղրիմ միջազգային դիտորդների ուղարկելը, որպեսզի նրանք կարողանան «համոզվել Ուկրաինայի բոլոր քաղաքացիների, ներառյալ էթնիկ ռուսների իրավունքների պաշտպանության հարցում»: Բացի այդ, ԱՄՆ-ն պնդում է «ռուսական զորքերի վերադարձն իրենց ռազմակայաններ»:

«Նախագահ Օբաման նշել է, որ առաջիկա օրերին պետքարտուղար Քերին նշված նպատակներին հասնելու համար կշարունակի քննարկումները Ռուսաստանի արտաքին գործերի նախարար Լավրովի, Ուկրաինայի կառավարության և միջազգային մյուս գործընկերների հետ»,-ասված է Սպիտակ տան հայտարարության մեջ:

Մինչ այդ ՄԱԿ-ի Անվտանգության խորհրդում անօրինական են ճանաչել Ղրիմի կարգավիճակի հարցով հանրաքվեի անցկացումը:

«Ուկրաինայի իրադրությունը վատանում է, քանի որ նշանակված հանրաքվեն անօրինական է»,-լրագրողներին ասել է ՄԱԿ-ի ներկայացուցիչը՝ ամփոփելով ԱԽ-ում կայացած կոնսուլտացիաների արդյունքները: «Օրինական կհամարվի միայն Ուկրաինայի ամբողջ տարածքում անցկացվելիք հանրաքվեն»,-հավելել է նա:

Նախօրյակին ՄԱԿ-ի ԱԽ-ում կայացել է դռնփակ հանդիպում, որի ընթացքում քննարկվել է Ուկրաինայի իրադրությունը:

Մինչդեռ Սևաստոպոլի քաղաքային խորհուրդը որոշում է ընդունել այն մասին, որ քաղաքը պետք է մտնի Ռուսաստանի կազմ` որպես ՌԴ-ի սուբյեկտ: Համապատասխան որոշումն ընդունվել է քաղխորհրդի` մարտի 6-ին կայացած արտահերթ նստաշրջանում: Ավելի վաղ հաղորդվել էր, որ քաղաքային խորհուրդը ՌԴ-ի կազմ Սևաստոպոլի մտնելու հարցը դրել է հանրաքվեի, որը նշանակված է մարտի 16-ին: