Վրաստանի վարչապետը Ուկրաինայի նոր կառավարությանը նախազգուշացրել է խուսափել Սաակաշվիլիի խորհուրդներից

Վրաստանի վարչապետ Իրակլի Ղարիբաշվիլին «Ուկրաինայի գործող կառավարությանը խորհուրդ է տալիս չլսել Միխեիլ Սաակաշվիլիի խորհուրդները»: Այդ մասին  հայտարարել է հանրապետության Հանրային հեռուստատեսությամբ: Ղարիբաշվիլին «զարմանք է հայտնել, որ Ուկրաինայի ներկայիս ղեկավարությունը խորհրդակցում է Սաակաշվիլիի հետ»: «Ինձ ասացին, որ նրան հրավիրել են որպես խորհրդական: Չեմ ցանկանում միջամտել Ուկրաինայի գործերին, բայց կարծում եմ, որ Սահակաշվիլիի խորհուրդները լսելը սխալ է»,-ասել է Ղարիբաշվիլին:

Նա հիշեցրել է, որ «Սաակաշվիլին այն մարդն է, որը չկարողացավ 2008 թվականին Վրաստանում խուսափել պատերազմից»: «Եթե Ուկրաինան նման ճգնաժամային իրավիճակում խորհրդական ունենա այդպիսի մի արկածախնդրի, կարծում եմ՝ մեծ սխալ կլինի, դա աղետալի հետևանքներ կունենա»,-ասել է վարչապետը:

Ղարիբաշվիլին խորհուրդ է տվել Ուկրաինայի իշխանություններին՝ «հաշվի առնել Սաակաշվիլիի կենսագրությունը, նրա ռադիկալ բնավորությունը, հարցերի նկատմամբ նրա արկածախնդրական մոտեցումները, այն, թե նա իր ժամանակին ինչ աղետի հասցրեց Վրաստանը»:

«Սահակաշվիլին սնվում է ճգնաժամային իրավիճակներով ու ռադիկալիզմով, նա իրեն վատ է զգում այնտեղ, որտեղ իրադրությունը կայուն է ու խաղաղ, ինչը նա քանիցս ապացուցել է»,-հավելել է Վրաստանի կառավարության ղեկավարը: