ՀՀ ԱՆ քրեակատարողական վարչությունը հերքում է

Արդարադատության նախարարության պաշտոնական կայքում զետեղված հաղորդագրության մեջ ասված է. ««Ժամանակ» օրաթերթի փետրվարի 18-ի համարում զետեղվել էր «Ո՞ւմ համար էր կաշառքը և ո՞վ է ծեծել դատապարտյալին. Ս. Սարգսյանը կպարզի՞» վերտառությամբ հրապարակումը: Հարկ ենք համարում անդրադառնալ տեղ գտած մի շարք «ոչ միտումնավոր անճշտությունների»: Հրապարակման մեջ անընդհատ նշվում է, որ «Գորիս» ՔԿՀ-ի պետի տեղակալ Նարեկ Հարությունյանը 4000 ԱՄՆ դոլար կաշառք է վերցրել: Նախ հայտնենք, որ արդարադատության մայոր Մարեկ Հարությունյանը «Գորիս» ՔԿՀ պետի տեղակալն էր տնտեսական գծով և որևէ դատապարտյալի «Դատապարտյալների հիվանդանոց» տեղափոխման հետ ի պաշտոնե առնչություն ունենալ չէր կարող: Մարեկ Հարությունյանի դեմ հարուցված քրեական գործն առայժմ նախաքննության փուլում է, իսկ փաստի առթիվ «Գորիս» ՔԿՀ-ում ներկայումս ծառայողական քննություն է ընթանում: Չմանրամասնելով հանգամանքները, համոզված ենք, որ դեպքը կաշառքի հետ աղերսներ չունի և նախաքննությամբ կպարզվի, թե իրականում ինչ է տեղի ունեցել: Լրատվամիջոցը չի հարգել անձի անմեղության կանխավարկածի իրավունքը՝ չսպասելով նախաքննության ավարտին՝ արարքին որակավորում է տվել ու առիթն օգտագործելով ևս մի անհաջող փորձ արել վարկաբեկել համակարգը:

Ինչ վերաբերվում է հաջորդ մտքին, թե թերթն «իմացել» է, որ պետի տեղակալին «կաշառքի գործով» բռնելուց հետո «Գորիս» ՔԿՀ-ի դատապարտյալ Արտակ Հակոբյանին «ամենայն հավանականությամբ համակարգի աշխատակիցները» առանց որևէ բան ասելու ծեծի են ենթարկել, պաշտոնապես հայտնում ենք, որ տեղեկատվությունը չի համապատասխանում իրականությանը: Ավելին. «Գորիս» քրեակատարողական հիմնարկի դատապարտյալների ավելորդ լարվածությունից խուսափելու նպատակով, ինչպես և՝ Ա. Հակոբյանի անվտանգությունից ելնելով, հիմնարկի աշխատակիցները նրա նկատմամբ առավել ուշադիր են:

Միջանկյալ նկարագրենք նախկինում 3 անգամ ազատազրկման դատապարտված Ա. Հակոբյանի կենսագրության այն հատվածները, որոնք առնչվում են անազատության վերջին տարիներին:

1978թ. ծնված Արտակ Հակոբյանը 2004թ-ին ՀՀ քրեական օրենսգրքի 175 հոդվածի 2-րդ մասի 1-ին և 4-րդ կետերով (ավազակությունը, որը կատարվել է. 1. մի խումբ անձանց կողմից նախնական համաձայնությամբ, 2. զենքի կամ որպես զենք օգտագործվող այլ առարկաների գործադրմամբ) դատապարտվել էր ազատազրկման 5 տարի 4 ամիս ժամկետով: 2009թ-ի մարտի 19-ին ազատվել էր, իսկ շուրջ մեկ տարի հետո՝ 20.08.2010թ-ին կրկին ձերբակալվել էր: 29.03.2011թ-ին Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի կողմից ՀՀ քրեական օրենսգրքի 176 հոդվածի 1-ին մասով (կողոպուտ), 178 հոդվածի 2-րդ մասի 1-2 կետերով (խարդախությունը, որը կատարվել է. 1. մի խումբ անձանց կողմից՝ նախնական համաձայնությամբ, 2. խոշոր չափերով), 179 հոդվածի 1-ին մասով (յուրացնելը կամ վատնելը), 182 հոդվածի 1-ին մասով (շորթում), 258 հոդվածի 2-րդ մասով (խուլիգանություն) և 133 հոդվածի 2-րդ մասի 2-րդ կետով (ազատությունից ապօրինի զրկելը, որը կատարվել է կյանքի կամ առողջության համար վտանգավոր բռնություն գործադրելով կամ դա գործադրելու սպառնալիքով) Ա. Հակոբյանը դատապարտվել է ազատազրկման 5 տարի 6 ամիս ժամկետով:

Պատժի կրման ընթացքում նա 17 անգամ կարգապահական տույժի է ենթարկվել: «Գորիս» ՔԿՀ վարչակազմի կողմից խիստ բացասական է բնութագրվում: Վերջինս դիմել է բժշկին և գանգատվել դյուրագրգռությունից, լարվածության զգացումից և քնի խանգարումից: Ըստ բժշկական քարտի գրառման՝ դատապարտյալը երբեմն դառնում է կոնֆլիկտային, վարքը՝ անկառավարելի: Ախտորոշվել է «Անձի հուզական անկայունության խանգարում», նշանակվել՝ դեղորայքային բուժում:

Հրապարակման մեջ նշվում է նաև, որ «Դատապարտյալների հիվանդանոց» ՔԿՀ-ն 150 տեղ ունի, որի միայն 10-20 տոկոսն են իրական հիվանդները զբաղեցնում: Այս տեղեկությունները ևս չեն համապատասխանում իրականությանը. «Դատապարտյալների հիվանդանոց» ՔԿՀ-ն նախատեսված է 463 դատապարտյալի համար: 21.02.2012 թ. դրությամբ հիմնարկում կա 162 դատապարտյալ, որից 19-ը, դատարանների որոշմամբ, նարկոլոգիական բաժանմունքում հարկադիր բուժում են ստանում, 21-ը՝ ինֆեկցիոն հիվանդներ են, որոնք մեկուսացված են, 26-ը՝ հոգեբուժական բաժանմունքում են, որից 2-ը, դատարանի որոշմամբ, հարկադիր բուժում են ստանում, 30-ը՝ տուբերկուլյոզից բուժվող հիվանդներ են:

Ի գիտություն թերթի հայտնենք, որ մնացած հիվանդները այլ ՔԿՀ-ներից տեղափոխվելով «Դատապարտյալների հիվանդանոց» ՔԿՀ անմիջապես հետազոտվում են և ըստ անհրաժեշտության՝ հնարավորինս օպերատիվ, բուժում են ստանում ու տեղափոխվում:

Հասարակությանը թյուրիմացության մեջ գցող, հրապարակման մեջ տեղ գտած մնացած անհեթեթություններին հարկ չենք համարում անդրադառնալ»: