Դատապարտյալի նամակագրության գաղտնիության իրավունքը կարող է սահմանափակվել ՔԿՀ պետի կողմից

Փետրվարի 27-ին Դավիթ Հարությունյանի նախագահությամբ տեղի ունեցավ ԱԺ պետական-իրավական հարցերի մշտական հանձնաժողովի նիստ, որտեղ քննարկվեցին եւ դրական եզրակացություն ստացան մի խումբ օրինագծեր: Այս մասին ասված է ՀՀ ԱԺ պաշտոնական կայքում զետեղված հաղորդագրության մեջ։

Առաջին ընթերցմամբ հանձնաժողովը քննարկեց ՀՀ կառավարության հեղինակած «ՀՀ քրեակատարողական օրենսգրքում փոփոխություններ եւ լրացումներ կատարելու մասին» ՀՀ օրենքի նախագիծը:

ՀՀ արդարադատության նախարար Հրայր Թովմասյանի տեղեկացմամբ՝ փոփոխություններով առաջարկվում է սահմանել, որ 14-18 տարեկան անչափահաս դատապարտյալները առանձին պահվեն չափահաս դատապարտյալներից, ինչը կբացառի վերջիններիս վտանգավոր ազդեցությունն անչափահաս դատապարտյալների վրա:

Ըստ հեղինակի՝ նախագծի ընդունման արդյունքում հնարավորություն կլինի հանցագործություն կատարած անչափահասներին պատիժը կրել միեւնույն քրեակատարողական հիմնարկում (չափահաս դառնալուց հետո՝ անչափահասներից անջատ): Մինչեւ նշանակված պատժի ավարտը չի ընդհատվի ուղղիչ-դաստիարակչական աշխատանքների կատարումը միեւնույն հիմնարկում, ինչն առավել արդյունավետ կլինի:

Սրանից բացի՝ քրեակատարողական հիմնարկի պետը դատարանի որոշման հիման վրա հնարավորություն կունենա սահմանափակելու դատապարտյալի նամակագրության գաղտնիության իրավունքը, որը, ըստ նախարարի՝ կնպաստի քրեակատարողական հիմնարկում անվտանգության եւ ուղղիչ հիմնարկի ներքին կանոնակարգի պահպանմանը, հանրության առողջության եւ բարոյականության, այլոց սահմանադրական իրավունքների պաշտպանությանը, այդ թվում նաեւ՝ այլ դատապարտյալների սոցիալական վերականգնմանը խոչընդոտող անմիջական վտանգի կանխմանը:

Հանձնաժողովի անդամները որոշ մտահոգություններ ունեին՝ կապված դատապարտյալների նամակագրության սահմանափակումների հետ: Համաձայնություն կայացվեց հետագա քննարկումների ընթացքում օրինագիծը լրամշակել եւ դարձնել երկուստեք ընդունելի:

Օրինագիծը հանձնաժողովի դրական եզրակացությամբ կընդգրկվի ԱԺ գարնանային եւ առաջիկա քառօրյա նիստերի օրակարգերի նախագծերում:

Առաջին ընթերցմամբ քննարկվեց ՀՀ կառավարության հեղինակած «Արտակարգ դրության իրավական ռեժիմի մասին» եւ «Վարչական իրավախախտումների վերաբերյալ ՀՀ օրենսգրքում լրացում կատարելու մասին» օրինագծերի փաթեթը եւ դրական եզրակացություն ստացավ առաջիկա քառօրյա նիստերի օրակարգում քննարկվելու համար: Երկրորդ եւ երրորդ ընթերցմամբ քննարկումները եւս նախատեսվում է իրականացնել այս քառօրյա նիստերի ընթացքում:

Երկրորդ ընթերցմամբ հանձնաժողովը քննարկեց պատգամավորներ Դավիթ Հարությունյանի, Վարդան Բոստանջյանի, Հեղինե Բիշարյանի հեղինակած «Ազգային ժողովի կանոնակարգ» ՀՀ օրենքում փոփոխություններ եւ լրացումներ կատարելու մասին» օրինագիծը՝ կից օրենսդրական փաթեթով, որը եւս ստացավ հանձնաժողովի դրական եզրակացությունը:

Մինչեւ 15 օրով հետաձգվեց ՀՀ կառավարության «ՀՀ քաղաքացիական դատավարության օրենսգրքում լրացումներ կատարելու մասին» օրենքի նախագծի քննարկումը: