Հայաստանում արհեստագործությունը պահանջված է, բայց երիտասարդները նախընտրում են բարձրագույն կրթություն ստանալ

Հայաստանում պահանջված մասնագիտություններ են մարկետինգը, հաշվապահությունը, տեղեկատվական տեխնոլոգիաները, ինչպես նաև արհեստագործությունը: ՀՀ աշխատանքի և սոցիալական հարցերի նախարարության «Զբաղվածության պետական ծառայություն» գործակալության պետ Արտակ Մանգասարյանը խորհուրդ է տալիս մասնագիտություն ընտրելիս հաշվի առնել աշխատաշուկայի պահանջարկը: «Որքան էլ զարմանալի է, բարձր է արհեստագործական մասնագիտությունների պահանջարկը, բայց, չգիտես ինչու, երիտասարդները կողմնորոշված են ավելի շատ բարձրագույն ուսումնական հաստատություններ ընդունվել, որը հետագայում խնդիրներ է առաջացնում աշխատաշուկայի ոչ հավասարակշռված լինելու պատճառով»,- «Արմենպրես»-ի հետ զրույցում նշեց Մանգասարյանը:

Անդրադառնալով հարցին, թե ինչն է այն անհամապատասխանության պատճառը, որ մարդկանց մոտ տպավորված է' աշխատանք չկա, իսկ պետական մարմիններն ասում են' տարբեր մասնագիտությունների գծով մեծ է պահանջարկը, պաշտոնյան նշեց. «Տեղեկատվության փոխանակման պակաս կա, ինչպես նաև լավ մասնագետների խնդիր ունենք»: Նա հավելեց, որ այդ հարցում բուհերին մեղադրել պետք չէ: «Նույն բուհն ավարտում են և շատ լավ, և շատ վատ մասնագետներ, մեղքը գցել ուսումնական հաստատությունների վրա, ճիշտ չի լինի: Ուղղակի մարդու ցանկությունից է կախված' նա ուզում է լինել լավ մասնագետ, թե ուզում է ուղղակի ունենալ դիպլոմ»,- ավելացրեց Մանգասարյանը:

Հարցին ի պատասխան, թե որքանով է մասնագիտական կողմնորոշման համակարգը ներդրված ու գործում' Արտակ Մանգասարյանը հայտնեց, որ իրենց նախարարությունում էլ գործում է երիտասարդների մասնագիտական կողմնորոշման մեթոդական կետրոնը: «Կարծում եմ' ժամանակի խնդիր է, որ այդ համակարգը լիովին բոլոր օղակներում ներդրվի ու գործի: Բացի այդ' փոքր տարիքից պետք է մասնագիտական կողմնորոշման հարցը դնել, արդեն ավագ դպրոցից այդ հարցին պետք է անդրադառնալ: Բոլոր ծնողներն ուզում են իրենց երեխաները բարձրագույն կրթություն ստանան, բայց պետք է հաշվի առնել այսօրվա շուկայի պահանջարկը»,- եզրափակեց Մանգասարյանը:

Ինչպես ցույց է տալիս վիճակագրությունը, Հայաստանում աշխատանք փնտրողների թիվը նվազել է 8.3 տոկոսով, գործազուրկներինն՝ աճել 1.3 տոկոսով: 2014թ. ապրիլի 30-ի դրությամբ, աշխատանք փնտրողների թիվը կազմել է 64 հազար 350 մարդ և նախորդ տարվա նույն օրվա համեմատ նվազել 8.3 տոկոսով, այդ թվում՝ գործազուրկների թվաքանակը կազմել է 60 հազար 995 մարդ. աճը 1.3 տոկոս է։

Այս տարվա ապրիլի վերջին գրանցված աշխատանք փնտրողներից 46.2 հազարը կանայք են (նվազումը՝ 7.2 տոկոս), 18.2 հազարը՝ տղամարդիկ (նվազումը՝ 10.8 տոկոս), իսկ գործազուրկներից կին են 44.3 հազարը (աճը` 0.9 տոկոս), տղամարդ՝ 16.7 հազարը (աճը՝ 2.5 տոկոս)։

Աշխատանք փնտրողներից 16-24 տարեկան է 6.8 հազար մարդ, 25-30 տարեկան՝ 9.3 հազար մարդ, գործազուրկներից 16-24 տարեկան է 6.5 հազար մարդ, 25-30 տարեկան՝ 8.7 հազար մարդ: Աշխատուժի ամենամեծ առաջարկը ներկայացվել է Երևանում (17.3 հազար աշխատանք փնտրող, 16.1 հազար գործազուրկ), Շիրակի (9.1 հազար աշխատանք փնտրող, 8.5 հազար գործազուրկ) և Լոռու (7.6. հազարական աշխատանք փնտրող և գործազուրկ) մարզերում։

2014-ի հունվար-ապրիլին աշխատանքով ապահովվել է 3 հազար 480 մարդ. 2013թ. նույն ժամանակահատվածի ցուցանիշը նվազել է 5.6 տոկոսով։ Հանրապետությունում աշխատուժի պահանջարկը, 2014թ. վերջի դրությամբ, կազմել է 1551 մարդ՝ 27.9 տոկոսով պակաս, քան մեկ տարի առաջ, իսկ աշխատանք փնտրողների թվաքանակը մեկ թափուր աշխատատեղի հաշվով՝ 42 մարդ. աճը կազմել է 2.4 տոկոս։