Ինձ առաջարկում են հանձնել քննություն այն ծրագրով, որը ես եմ կազմել

Հայաստանում ֆրանսիական համալսարանը շարունակում է արհամարհել ՀՀ օրենսդրության պահանջները։ 

Դատարանի կայացրած որոշումն այն մասին, որ 2010 թվականին ազատված դասախոսներին վերադարձվեն իրենց աշխատավարձերն ու վերընդունեն աշխատանքի, փաստորեն չի կատարվել։ Հիշեցնենք, որ Հայաստանում ֆրանսիական համալսարանի ռեկտոր Ժոել լը Մորզելեկը 2010 թվականին Ֆրանսիական համալսարանի 29 դասախոսների ազատել էր աշխատանքից: Աշխատանքից ազատված դասախոսները պնդում են, որ Ֆրանսիական համալսարանն իրենց հետ պայմանագիր էր կնքել 2007 թվականին` 1 տարի ժամկետով։ Այդ պայմանագիրը չի խզվել, իսկ աշխատանքային օրենսգրքի 111-րդ հոդվածի համաձայն՝ եթե որոշակի ժամկետով կնքված աշխատանքային պայմանագրի գործողության ժամկետը լրանալուց հետո պայմանագիրը չի լուծվում, և աշխատանքային հարաբերությունները շարունակվում են, ապա պայմանագիրը համարվում է կնքված անորոշ ժամկետով: Սույն գործով դատարան դիմել են ընդամենը 12 դասախոս:Դատարան դիմած 12 դասախոսներից 4–ը դատարանի վճռից հետո դիմում գրեցին ու հեռացան, իսկ մնացածը շարունակում են պայքարել իրենց իրավունքների համար։

Այս թեմայով ԼՈՒՐԵՐ.com լրատվականի լրագրողը զրուցեց այդ դասախոսներից մեկի՝ Գայանե Հակոբյանի հետ, որը մինչև ազատումը եղել էր նույն համալսարանի Անգլերենի ամբիոնի վարիչը։ «Ինձ առաջարկում են հանձնել քննություն այն ծրագրով, որը ես եմ կազմել»,- ասում է տիկին Հակոբյանը:

«Դուք չեք պատկերացնի, թե ինչ ներդրում ունենք մենք այդ համալսարանի գործունեության մեջ։ ԱՄՆ–ից աղջիկս զանգում էր ու հորդորում էր այդքան երկար չմնալ համալսարանում՝ վախենալով իմ առողջության համար։ Ես եռանդով ու նվիրվածությամբ կատարել եմ իմ՝ դասախոսի ու ամբիոնի աշխատանքները։ Ամեն մասնագիտության համար անգլերենի հատուկ բառապաշարով գրքերով եմ դասավանդել, որ ուսանողը հանկարծ մասնագիտական խնդիրներ չունենա։ Պատահական չի, որ ես կարող եմ հանգիստ բանավիճել իրավաբանի հետ անգլերենով՝ իր իսկ մասնագիտության թեմայով, որովհետև 10 տարի թրծվել եմ այդ դաշտում»,– ասում է Գայանե Հակոբյանը։ Ապա խնդրում է, որ ասածներն ավելորդ անհամեստություն չհամարենք, որովհետև ասածն իրականություն է։ 

«Այսօր այն ռեկտորը, որը խախտել է մեր իրավունքները, բարձր ամբիոններից մարդու իրավունքների մասին դասախոսություն է կարդում։ Այն դարավոր բարեկամությունը, որ ձևավորվել է հայ և ֆրանսիացի ժողովրդի մեջ, որի ապացույցն էր Սարկոզիի վերջին այցն ու քայլերը, խախտվում են մեկ անօրեն ֆրասիացի կնոջ պատճառով»։ Նշենք, որ այս թեմայով Ֆրանսիական համալսարանը և նրա ռեկտոր Ժոել Լը Մորզելեկի կողմից որևէ բացատրություն ստանալ հնարավոր չէ, քանի որ նրանք այս թեմայով խոսել հրաժարվում են։