Ռուսաստանն արգելում է մրգերի ու բանջարեղենի ներկրումն Ուկրաինայից

Ռուսաստանը հոկտեմբերի 22-ից Ուկրաինայից ամբողջ բուսական արտադրանքի ներմուծման և տարանցման արգելք է սահմանում: Ինչպես ասված է ՌԴ-ի Անասնաբուժական և բուսասանիտարական հսկողության համերկրային ծառայության («Ռոսսելխոզնադզոր») հաղորդագրության մեջ, այս որոշումն ընդունվել է այն պատճառով, որ մինչ օրս Ուկրաինայի իշխանությունները չեն ուղարկել Ռուսաստանին մատակարարվող բուսական արտադրանքի ուկրաինական ծագման «համոզիչ երաշխիքներ»: Այդ փաստաթղթերը պետք է ստացվեին մինչև հոկտեմբերի 21-ը, տեղեկացնում է «Արմենպրես»-ը՝ հղում անելով ռուսական լրատվամիջոցներին:

Ռուսաստանը կասկածում է, որ այժմ Ուկրաինայի տարածքով գալիս են բուսական բեռներ Եվրամիությունից, որոնց նկատմամբ Մոսկվան պատժամիջոցներ է սահմանել:

«Անհայտ ծագման արտադրանքի մատակարարումները խախտում են ինչպես միջազգային առևտրի հիմնական սկզբունքներն, այնպես էլ Մաքսային միության և Ռուսաստանի օրենսդրությունը»,- ասված է «Ռոսսելխոզնադզորի» հաղորդագրության մեջ:

Ավելի վաղ արգելվել էր նաև Ուկրաինայից հյութերի, կաթնամթերքի և պանրեղենի, հրուշակեղենի, ձկան և պտուղ-բանջարեղենի պահածոների և ալկոհոլի տարբեր տեսակների ներկրումը Ռուսաստան:

Ուկրաինայի իշխանությունները պնդում են, որ ուկրաինական արտադրանքի ներկրման արգելքն Առևտրի համաշխարհային կազմակերպության կանոնների խախտում է, և Ռուսաստանին դատաքննությամբ են սպառնացել այդ կազմակերպության շրջանակներում: