Ռոուհանին կոչ է արել տարածաշրջանի երկրներին՝ միավորվել ԻՊ-ի դեմ պայքարում

Իրանի նախագահ Հասան Ռոուհանին կոչ է արել մերձավորարևելյան պետություններին՝ միավորվել «Իսլամական պետություն» ահաբեկչական խմբավորման դեմ պայքարում: Այդ մասին, ինչպես տեղեկացնում է «Արմենպրես»-ը, հոկտեմբերի 22-ին հաղորդել է ԻՌՆԱ գործակալությունը:

«Տարածաշրջանի երկրները պետք է ահաբեկչությանը դիմակայեն փոխհամաձայնեցված ու միավորված ջանքերով, որպեսզի արմատախիլ անեն այդ չարիքը»,- ասել է նախագահն Իրաքի վարչապետ Հայդեր ալ Աբադիի հետ Թեհրանում կայացած հանդիպմանը:

Իրաքի կառավարության ղեկավարն Իրանում էր գտնվում մեկ օրով:

Ռոուհանին նշել է. «Մենք կասկած չունենք, որ Իրանի և Իրաքի միջև բարեկամական հարաբերությունների զարգացումը կծառայի երկու երկրի շահերին և կհամապատասխանի տարածաշրջանային շահերին»: Նա ընդգծել է, որ Թեհրանը Բաղդադին աջակցել է «ամենաառաջին օրից և կշարունակի այդ ճանապարհով ընթանալ մինչև վերջ»: Ալ Աբադին իր կողմից ասել է, որ «ահաբեկչությունը սպառնալիք է ամբողջ տարածաշրջանի համար, և մենք վստահ ենք, որ Իրանը մեր կողմում կլինի»:

Ավելի վաղ Իսլամական Հանրապետության արտաքին գործերի նախարարի՝ արաբական և աֆրիկյան երկրների հարցերով տեղակալ Հոսեյն Ամիր Աբդոլահիյանը հայտարարել է, որ Իրանը մտադիր չէ մասնակցել Իրաքում և Սիրիայում «Իսլամական պետություն» խմբավորման դեմ պայքարող ԱՄՆ-ի կոալիցիային՝ այն համարելով «կասկածելի» և «ձախողման դատապարտված»:

Աբդոլահիյանը նաև նշել է, թե իրանական կողմը «կասկածներ ունի ահաբեկչության դեմ պայքարում ԱՄՆ-ի իսկական նպատակների կապակցությամբ»: Նրա խոսքով՝ դաշինքի կողմից ձեռնարկվող միջոցները «չեն փոխել ԻՊ-ի հետ կապված իրադրությունը և միայն խստացրել են ծայրահեղականությունը»: Դրա հետ մեկտեղ բարձրաստիճան դիվանագետն ընդգծել է, որ Իրանի ղեկավարությունն աջակցում է Իրաքին և Սիրիային ահաբեկչության դեմ մղվող նրանց պայքարում:

Թեհրանը քանիցս հայտարարել է, որ չի պատրաստվում Իրաքի տարածքում անմիջականորեն մասնակցել ծայրահեղականների դեմ ռազմական գործողություններին: Դրա հետ մեկտեղ իրանական կողմն ակտիվորեն օգնում է Իրաքին զենքով, ինչպես նաև իր օգնությունն է տրամադրում զինվորականների պատրաստման գործում, հաղորդել է «Ինտերֆաքս»-ը: