ԱՄԷ-ում ավտոմոբիլների անվադողերը կհանդերձվեն Էլեկտրոնային անձնագրերով

Արաբական Միացյալ Էմիրություններում (ԱՄԷ) մոտ ժամանակներս ավտոմոբիլների բոլոր անվադողերը կհանդերձվեն Էլեկտրոնային անձնագրերով, տեղեկացնում է «Արմենպրես»-ը:

«Խելացի անվադողերը» մեքենաների տերերին վտանգի մասին կհայտնեն շարժական սարքերի միջոցով: Ինչպես հաղորդել է Gulf News թերթը, արդեն եկող տարվա սկզբին առանց հատուկ թվային չիպերի անիվները օրենքից դուրս կլինեն և երկրի տարածքում կարգելվի դրանց օգտագործումը:

«Ամբողջ խնդիրը ԱՄԷ-ի չափազանց շոգ կլիման է,-թերթին հայտնել է Էմիրությունների Ստանդարտացման ծառայության ներկայացուցիչ ինժեներ Ջասեմ ալ Ալին:-Սովորական անվադողերը չեն դիմանում բարձր ջերմաստիճանին, ձևափոխվում են, ինչպես նաև պայթում են շահագործման ընթացքում: Մենք գրանցել ենք բազմաթիվ դժբախտ դեպքեր, որոնց պատճառը եղել են անիվները»:

Նրա խոսքով՝ «Էմիրությունների շուկա են ներկրվում մեծ քանակությամբ ֆիրմային «հյուսիսային անվադողեր», ինչպես նաև հայտնի արտադրողների կեղծված արտադրանք»: «Մենք մշտապես այդ մասին նախազգուշացնում ենք ներմուծողներին, բայց նրանց մի մասն անտեսում է կանոնները այսրոպեական շահ ստանալու համար,-նշել է Ջասեմ ալ Ալին,-դրա հետ մեկտեղ սպառողների մեծամասնությունը տեղյակ չէ այդ խնդրին և վտանգի են ենթարկում իրենց կյանքը»:

«Էլեկտրոնային անձնագրերը»,-գրում է թերթը,-պետք է տեղակայվեն յուրաքանչյուր անիվի վրա: Դրանք ամբողջական տեղեկատվություն կպարունակեն թողարկման տարեթվի, տեխնիկական բնութագրերի վերաբերյալ: Այդ տեղեկատվությանը կարելի է ծանոթանալ գնորդի շարժական սարքերով: «Խելացի անվադողերը» նաև մեքենայի տիրոջը կնախազգուշացնեն փոխարինման անհրաժեշտության և դեֆորմացման վտանգի մասին:

Արդեն եկող տարի, ինչպես հրատարակությանը հայտնել են ԱՄԷ-ի Ստանդարտացման ծառայությունում, ոստիկանության տեսուչները կսկսեն ստուգել նման թվային անձնագրերի առկայությունը և, հնարավոր է՝ առգրավեն անօրինական անվադողերը, հաղորդել է ՏԱՍՍ-ը: