«Գործն իմ դեմ են պտտել ռեկտորի անունը փրկելու համար». Պոլիտեխնիկի հեռացված դասախոսը՝ բուհի ռեկտորի սեքս սկանդալի մասին PressIdent.am

Հասարակություն 8 Նոյեմբեր, 2014 14:11

Երևանի պետական ճարտարագիտական համալսարանի ռեկտոր Հովհաննես Թոքմանջյանի անվան շուրջ բարձրացած սեքս սկանդալից հետո կրքերը շարունակում են թեժ մնալ: Ռեկտորը, ով օրերս կայացած մամուլի ասուլիսին չափազանց ինքնավստահ հայտարարել է, որ որևէ մեկը կարող է հույս չունենալ, ինքը հրաժարական չի տալու, սեփական պատիվն ու հեղինակությունը փրկելու համար քավության նոխազներ է փնտրում: Դատելով նրա գործողություններից՝ անթաքույց արշավ է սկսել իր ղեկավարած համալսարանի Տեղեկատվական և հեռահաղորդակցական տեխնոլոգիաների վարչության պետ Վլադիմիր Խոեցյանի (ով ավելի վաղ ահազանգել էր, որ ռեկտորի սեքս սկանդալի համար փորձում են իրեն մեղադրել), և պրոռեկտոր, Ֆիզիկայի ամբիոնի վարիչ Աշոտ Խաչատրյանի դեմ:

PressIdent.am-ի հետ զրույցում Վլադիմիր Խոյեցյանն ասաց, որ իրեն հեռացրել են աշխատանքից՝ Աշխատանքային օրենսգրքի կոպտագույն խախտումներով: «Ինձ տրվել է 2 նկատողություն և, իր կարծիքով (նկատի ունի ռեկտորին- հեղ.), օրենքով է հեռացրել, սակայն Աշխատանքային օրենսգրքում գրված է, որ եթե նկատողություններից որևէ մեկը գտնվում է վարչական դատարանի վարույթում, դրա հիման վրա չի կարելի մարդուն աշխատանքից հեռացնել»,- հայտնեց Վլադիմիրը: Ըստ նրա՝ իր առաջին նկատողության համար դիմել է Վարչական դատարան, որի մասին ռեկտորը ծանուցվել է պատշաճ կերպով: «Առաջին նկատողության մեջ 3 կետ է եղել. առաջինում ուղղակի գրված է, որ հանձնարարություն է տրվել ու չեմ կատարել, սակայն հղում չկա' ինչ հանձնարարություն, ինչ հրամանով:

Փաստաբանն էլ ասաց, որ դատարանում այդ կետն ուղղակի չի դիտարկվելու: Հիմնական կետն այն է, որ ամբիոններից մեկի վարիչը բողոքել է, թե խնդրով զանգել են մեր վարչություն, ասել ենք, որ մարդ կուղարկենք ու չենք ուղարկել: Իր ասած օրն ու ժամին իր ասած հեռախոսահամարով ուղղակի չէր կարող պատասխանող լինել: Այդ օրն այդ սենյակում ոչ ոք չի եղել, քանի որ տանիքներում զբաղված են եղել լարեր քաշելով: Աշխատակիցների հետ եղել են այլ ընկերության աշխատակիցներ, ովքեր կարող են դա հաստատել»,- նշեց բուհի Տեղեկատվական և հեռահաղորդակցական տեխնոլոգիաների վարչության նախկին պետը' հավելելով, որ դա զրպարտանք է: Վլադիմիր Խոյեցյանը հայտնեց նաև, որ նույն ամբիոնի վարիչի բողոքի հիման վրա ստացել է երկրորդ նկատողությունը, ըստ որի՝ իբր ձախողել է դասերը: Դասախոսը շեշտեց, որ այդ փուլում որոշ բացակայություններ, այո, ունեցել է, քանի որ սեքս սկանդալի հարցով եղել է ռեկտորի ներկայացուցիչը ոստիկանությունում: «Հիմա ինձնից փաստաթուղթ են պահանջում, որ ես ոստիկանությունում եմ եղել, ոստիկանությունից էլ ասում են, որ հետին ամսաթվով չեն կարող տալ այն տալ, իսկ ես այն ժամանակ չեմ պատկերացրել, որ կարող է ռեկտորին ոստիկանությունում ներկայացնելու համար նման խնդրի առաջ կանգնեմ»,- նկատեց Խոյեցյանը: Անդրադառնոլով ռեկտորի մեղադրանքին, թե ինքն ու իր օգնականը՝ Վահե Կիրակոսյանն են սեքս սկանդալի տարածման հեղինակները՝ համակարգչային մասնագետն ասաց, որ կիբերհանցագործությունները հիմնականում չեն բացահայտվում՝ հիմնավորելով. «Կիբեհանցագործություն բացահայտելը շատ բարդ է:

Գործն իմ դեմ են պտտել ռեկտորի անունը փրկելու համար: Այս գործին էլ էր սպառնում. նա (նկատի ունի՝ Հ. Թոքմաջյանին-հեղ.) մտածում է, որ որոշ ժամանակ անց, երբ ոստիկանության քննչական ծառայությունը հայտներ, որ չեն հայտնաբերել՝ ով է դրա տարածելու հեղինակը՝ հայտարարելով, որ ամենայն հավանականությամբ, այդ երկխոսությունը սարքված է, մարդիկ չեն հավատա դրան՝ ասելով, որ՝ հա, դե, իրենց մարդն է, հո չէին ասելու, որ ինքն է գրել: Այսինքն' ինքը համարում է, որ իր անունը չի մաքրվի այս կեղտոտ պատմությունից ու, իմ կարծիքով, որոշել է գտնել մեղավորին: Իմ թեկնածության վրա է կանգնել, քանի որ խոսակցություններ է տարածել, թե քեռիս' Աշոտ Խաչատրյանը, ռեկտոր դառնալու ցանկություն ունի, և ես նրան օգնելու շարժառիթ ունեի: Ես համակարգչային մասնագետ եմ, և հանրությունը չի խորանալու, որ ֆեյսբուքյան էջ ջարդելը բոլորովին այլ բան է»,- ընդգծեց Խոյեցյանը: Նրա խոսքով՝ ռեկտորի համակարգիչը, որից, հավանաբար, տարել են նրա գաղտնաբառը, անգամ աշխատանքային համակարգիչ չէ, հետևաբար՝ իր հսկողության տակ չէ: «Դա ռեկտորի անձնական նոթբուքն է, որը ոչ մի անգամ չի սպասարկվել մեր կողմից, իսկ համացանցից օգտվել է 3G-ով' առանց մեր՝ բուհի լոկալ ցանցին կպնելու»,- շեշտեց բուհի Տեղեկատվական և հեռահաղորդակցական տեխնոլոգիաների վարչության հեռացված պետը:

PressIdent.am-ը փորձեց զրուցել նաև բուհի արդեն նախկին պրոռեկտոր, Ֆիզիկայի ամբիոնի նախկին վարիչ Աշոտ Խաչատրյանի հետ, սակայն վերջինս հրաժարվեղ որևէ պարզաբանում տալ այս հարցի առնչությամբ: Փոխարենը՝ Վլադիմիր Խոյեցյանը նկատեց, որ Աշոտ Խաչատրյանին պաշտոնանակ անելը պարզ հաշվեհարդար է Հովհաննես Թոքմաջյանի կողմից: «Խաչատրյանի հետևից են ընկել, քանի որ նա ինձ չասաց' սրանց հետ մի կռվի… Հինգշաբթի օրվա գիտխորհրդի նիստում Խաչատրյանի՝ պրոռեկտորական հաստիքի կրճատման հարց է եղել, որին ուսանողությունը միաձայն դեմ է քվեարկել: Ռեկտորն ասել է, թե կառուցվածքային փոփոխությունների հարց է ու ընդամենը երկու ամիս առաջ իր նախաձեռնությամբ բացված հաստիքի կրճատման հարց է դնում՝ ասելով, թե նպատակահարմար չի գտնում, որ այդ հաստիքը լինի»,- հայտնեց Վլադիմիր Խոյեցյանը: Պոլիտեխնիկի նախկին դասախոսի խոսքով՝ աննախադեպ, աբսուրդ քվեարկություն էր կազմակերպվել: «Ռեկտորը կարդում էր մարդկանց անուն-ազգանունը, գոռում էին' կողմ կամ դեմ: Արդյունքում՝ եղավ 45 կողմ, 45 դեմ: Թոքմաջյանն էլ, առանց արդյունքներն ամփոփելու, 10 րոպե ընդմիջում արեց, առողջական խնդիրներ ունեցող մի դեկանի տարավ ներսի սենյակ: Առանձնազրույցից հետո այդ մարդը փոխեց իր կարծիքը, և կրկնակի քվեարկության արդյունքում ձայների հարաբերակցությունը եղավ 44 դեմ և 46 կողմ: Նա հայտարարեց, որ հաստիքը կրճատվում է, սակայն, Պոլիտեխնիկի կանոնադրության համաձայն, որոշումը համարվում է կայացված, եթե գիտխորհրդի անդամների, ոչ թե ներկաների կեսը և ավելին է կողմ լինում»,- ընդգծեց Վլադիմիր Խոյեցյանը՝ միաժամանակ շեշտելով, որ իրենց հալածելու մոլուցքի մեջ ռեկտորն արդեն օրենքներ է խախտում՝ ոչնչի առաջ կանգ չառնելով: Անդրադառնալով Աշոտ Խաչատրյանին նաև ամբիոնի վարիչի պաշտոնից օրերս զրկելուն՝ Խոյեցյանը դա ևս համարեց բուհի ռեկտոր Հովհաննես Թոքմաջյանի կամայականության արդյունքը՝ զուրկ որևէ հիմքից: «Գոյություն ունի առարկայական ծրագիր, որը հաստատում է Ուսումնամեթոդական վարչությունը: Ֆիզիկան նախկինում անցնում էին 3 կիսամյակ, այժմ դարձել է երկու, ինչի պատճառով առարկայական ծրագրում փոփոխություններ են եղել: Հաստատվելուց երկու ամիս անց ակադեմիկոս Էդուարդ Ղազարյանը ստուգումներ է անցկացնում, և գրում, որ տարբեր մասնագիտությունների համար առարկայական ծրագրերը իրար շատ նման են, ինչի հիման վրա նա հեռացրեց ընտրված ամբիոնի վարիչին: Դա աբսուրդ է, քանի որ բուհի գիտխորհուրդն է ընտրել նրան, գիտխորհուրդն էլ իրավուքն ունի հեռացնելու: Ընդ որում՝ նա աշխատել է Ուսումանամեթոդական վարչության հաստատած ծրագրով: Նրա գրածը ենթադրում էր, որ հաջորդ տարիների համար կարելի է վերանայել ծրագիրը»,- նշեց Խոյեցյանը: Վերջինս պատմեց նաև, որ ռեկտորի կողմից արշավը միայն ապօրինի գործողություններով չի սահմանափակվում. դրանում ներքաշվել է նաև բուհի աշխատակազմի նորանշանակ ղեկավար Սամսոն Զատիկյանը, ով մի քանի օր առաջ փորձել է սադրել Աշոտ Խաչատրյանին՝ անձնական վիրավորանքներ հասցնելով ներգրավել կռվի մեջ, սակայն վերջինս հասկացել է միտումն ու կռվի մեջ չի մտել:

Բուհի ռեկտոր Հովհաննես Թոքմաջյանի ո՛չ ընդունարանում, ո՛չ հասարակայնության հետ կապերի բաժնում զանգերին երեկ չպատասխանեցին, թեև աշխատանքային օրը դեռ չէր ավարտվել: Հարցին՝ ռեկտորի հետ մինչ այս անձնական խնդիր ունեցե՞լ են, Վլադիմիր Խոյեցյանը պատասխանեց՝ ոչ: Ըստ նրա՝ դա պայմանավորված է իր մասնագիտությամբ, քանի որ հանրային կարծիքի տեսանկյունից ամենահարմար թեկնածուն ինքն է: Նա տեղեկացրեց նաև, որ բաց նամակով դիմելու է Կրթության և գիտության նախարար Արմեն Աշոտյանին, որը ոչ միայն լրատվամիջոցներով է տարածելու, այլև տանելու է ԿԳ նախարարություն: