Անգելա Մերկելը հարգել է Բեռլինյան պատի վրայով փախուստի ժամանակ զոհվածների հիշատակը

Գերմանիայի կանցլեր Անգելա Մերկելը շաբաթ օրն այցելել է Բեռնաուեռ փողոցում գտնվող հուշահամալիր, հարգանքի տուրք մատուցելու Բեռլինյան պատն անցնելու փորձերի ժամանակ զոհվածների հիշատակը: «Շատ մարդիկ ստիպված եղան տառապելու, որպեսզի պատը քանդվի»,- նշել է նա N-24 հեռուստաընկերության հետ զրույցում: «Արմենպրես»-ի հաղորդմամբ' ինչպես տեղեկացնում է «ՌԻԱ Նովոստին», Մերկելի հետ հուշահամալիր են այցելել մի շարք պաշտոնատար անձինք: Պատի անկումը կանցլերը բնորոշել է որպես ժամանակակից աշխարհին ուղղված կոչ, որտեղ կան բազմաթիվ վիճահարույց հարցեր ու հակամարտություններ, մասնավորապես, ինչպիսիք են Ուկրաինայում, Իրաքում և Սիրիայում առկա ճգնաժամերը: «Կարելի է ամեն ինչ փոխել դեպի լավը, հենց դա է այն կոչը, որն իր մեջ պարունակում է պատի անկումը»,-նշել է Մերկելը:

Բեռլինում նոյեմբերի 9-ին տոնում են Բեռլինյան պատի անկման 25-րդ տարեդարձը: Պատը կառուցվել է 1961 թվականին, որպես «հակաֆաշիստական պատնեշ», որով սոցիալիստական ԳԴՀ-ն բաժանվեց իր արևմտյան հարևաններից: