Պնդելու ենք մեր մոտեցումը. Լևոն Զուրաբյան (տեսանյութ)

«Ամեն ինչ պետք է անենք, որ իսկապես մենք շարժումը հասցնենք հաղթական ավարտի»,- այսօր լրագրողների հետ ճեպազրույցում ասաց ՀԱԿ խմբակցության ղեկավար Լևոն Զուրաբյանը:

Վերջինս խոսելով ՀԱԿ և ԲՀԿ տարբերվող հայտարարությունների մասին՝ նշեց, որ դա բնական երևույթ է: «Կարող է լինել բնական տարբերություններ շարժման մեթոդոլոգիայի կամ պայքարի ձևերի վերաբերյալ: Սրանք բնական բաներ են, որոնք լուծվում են եռյակի քննարկումների ընթացքում»,- ասաց Զուրաբյանը:

Հարցին, թե հակասություններ չկա՞ն կուսակցությունների միջև, Լևոն Զուրաբյանը նշեց, որ նման բան գոյություն չունի:

«Որևէ հակասություն գոյություն չունի, իսկ որ տարբերություններ կարող են լինել մեթոլոգիայի և պայքարի ձևերի վերաբերյալ, կարծում եմ՝ դա բնական է և անբնական կլիներ, եթե նման բան չլիներ: Առավել ևս այդ մտահոգությունները խորանում են, երբ մենք տեսնում ենք, թե ինչ մեծ գործ ենք հաջողել, ինչ մեծ հույս ենք արթնացրել, ինչ լուրջ ալիք է բարձրացել, և բնական է, որ ոչ ոք չի ցանկանում հանկարծակի ինչ-որ սխալների պատճառով այդ ամբողջ շարժումը ձախողել»,- նշեց խմբակցության ղեկավարը:

Նրա կարծիքով՝ ՀԱԿ-ը ներկայացնում է արդյունավետ պայքարի վերաբերյալ իրենց մոտեցումները: «Ուրիշ բան չենք անում, ոչ մեկին ոչ մեղադրում ենք, ոչ մուննաթ ենք գալիս, մենք ներկայացնում ենք մեր տեսակետները և դրանցում համոզված ենք և ցանկանում ենք հաղթել: Վերջին հաշվով, ամեն ինչ որոշվում է եռյակի քննարկումներով: Բոլոր այս մտահոգությունները հաղթահարելի են, և մենք դրանք կհաղթահարենք, առավել ևս, որ մեր ետևում կանգնած է ժողովուրդը, որը մեզ հավատում է»,- ասաց Զուրաբյանը:

Հարցին, թե արդյոք ԲՀԿ պատասխանը ՀԱԿ-ի հայտարարությանը գործընկերայի՞ն էր, Լևոն Զուրաբյանն ասաց. «Մենք գործընկերային, փոխըմբռնման հարաբերություններ ունենք, և ես որևէ խնդիր չեմ տեսնում: Դաշնակիցների հարաբերություններում սովորական բան է սա»:

Թե երբ կլինի ընդդիմության հաջորդ հանրահավաքը, Զուրաբյանը դժվարացավ պատասխանել՝ ասելով, որ այդ որոշումը պետք է կայացվի երեք ուժերի կողմից: «Պետք է լինի որոշում, դուք ուզում եք, որ ես կռահե՞մ, նման պայծառատեսություն չունեմ: Իսկ նիստում մենք պնդելու ենք մեր մոտեցումը»: