Ջերմագին ողջույններ «Բոկո հարամ»-ից Ադրբեջանին

Այն դեպքում, երբ ամբողջ աշխարհի ուշադրությունը սևեռված է Իրաքի և Սիրիայի զգալի տարածքները զավթած և այնտեղ ահաբեկչական վարչակարգ ստեղծած «Իսլամական պետություն» (ԻԼԻՊ) կրոնական ծայրահեղական խմբավորմանը, նիգերիական արմատական «Բոկո հարամ» խմբավորման առաջնորդ Աբուբեքր Շեկաուն ողջույններ է հղել իր ադրբեջանցի եղբայրներին:

Այս մասին, ինչպես հաղորդում է «Արմենպրես»-ը, հայտնում է «Ֆրանս Պրես» լրատվական գործակալությունը՝ նշելով, որ Նիգերիայի քաղաքներից մեկում տեղաբնակներին քարոզ կարդալու ժամանակ Աբուբեքր Շեկաուն հիշատակել է նաև Ադրբեջանը:

Գործակալության տրամադրության տակ հայտնված 40 րոպե տևողությամբ տեսանյութում իր մերձավորների հետ զրահատեխնիկայի վրա կանգնած Շեկաուն տեղացիներին հայտարարել է, որ «խաիլֆայություն» է ստեղծում Նիգերիայում, և որ իր կողմից զավթված բոլոր բնակատեղիներում արդեն գործում են շարիաթի օրենքները:

Նա հայտարարել է նաև «Իսլամական պետության» նկատմամբ իր աջակցությունը: Շեկաուն հայտարարել է, որ պատրաստվում է իր տարածքները միավորել համաշխարհային «խալիֆայությանը»:

«Շնորհավորում եմ բոլորին, ովքեր արդեն բնակվում են Իսլամական պետությունում: Հատուկ ցանկանում եմ ողջույններս հղել մեր եղբայրներին Ադրբեջանում, Աֆղանստանում, Պակիստանում, Չեչնիայում, Եմենում և Սոմալիում», -հայտարարել է «Բոկո հարամ»-ի առաջնորդը:

Նիգերիայում գործող «Բոկո հարամ» իսլամիստական խմբավորումը, որը մի քանի ամիս առաջ մեծ թվով աշակերտուհիների էր առևանգել, համարվում է «Ալ Կաիդա» միջազգային ահաբեկչական խմբավորման բաղկացուցիչ մասը:

«Ֆրանս Պրես»-ը հիշյալ տեսանյութը չի հրապարակել նրա քարոզչական ուղղվածության պատճառով՝ նյութում տեղադրելով միայն մի քանի լուսանկար տեսահոլովակից: «Իսլամական պետություն» ահաբեկչական խմբավորումը վերջերս կազմել էր «համաշխարհային խալիֆայության» քարտեզը, որի կազմում եղել էր նաև Ադրբեջանը: Ներկայում Իրաքում և Սիրիայում Ադրբեջանի հարյուրավոր քաղաքացի ջիհադականներ են կռվում «Իսլամական պետության» կազմում: Ադրբեջանական ԶԼՄ-ների տվյալներով' Սիրիայում պատերազմի սկզբից մինչ այժմ ԻԼԻՊ-ի կազմում կռվող 200-ից ավելի ադրբեջանցի մոջահեդներ են ոչնչացվել:

2013 թ. մայիսին Սիրիայում կռվող ադրբեջանցիները հանդես էին եկել հերթական տեսադիմումով, որում հայրենակիցներին կոչ էին արել ջիհադ (պատերազմ՝ հանուն հավատի) անել Սիրիայում:

Որոշ դիտորդների կարծիքով, Սիրիայում և Իրաքում ընթացող բախումները հնարավոր է ապագայում ներթափանցեն նաև Ադրբեջան: Եթե նախկինում ենթադրվում էր, որ այդ թշնամությունը տեղի է ունենալու շիա և սունի արմատական վահաբիների միջև, ապա այժմ դաժան դիմակայություն է սկսվել արմատական իսլամիստական խմբավորումների միջև: Որոշ ժամանակ առաջ ադրբեջանցի մոջահեդներից մեկի կողմից ԻԼԻՊ-ի կազմում կռվող ադրբեջանցիներին ուղղված մեղադրանքը իսկական թշնամության է վերածվել այդ խմբավորումների միջև, ինչը գնալով ավելի է խորանում:

Իսրայելցի փորձագետ, նախկին դիվանագետ, Իսրայելի «Նաթիվ» կենտրոնի նախկին ղեկավար Յակով Քեդմին ադրբեջանական virtualaz.org լրատվական կայքին տված հարցազրույցում Ադրբեջանում կրոնական հողի վրա լարվածության հետ կապված ասել էր, որ իսլամիստական խմբավորումների մարտիկների՝ Սիրիայից Ադրբեջան վերադարձը կարող է պատճառ դառնալ երկրում ներքին կայունության կտրուկ խախտման և ահաբեկչական գործողությունների աճի համար: