Համացանցում ԻԼԻՊ-ի ադրբեջանցի և թուրք մարտիկների միասին գործելու տեսանյութ է հայտնվել (տեսանյութ)

Համացանցում տեսանյութ է հայտնվել, որով ապացուցվում է «Իրաքի և Լևանտի իսլամական պետություն» (ԻԼԻՊ) ահաբեկչական խմբավորման կազմում ադրբեջանցիների և թուրքերի համատեղ գործելու մասին:

Ինչպես հաղորդում է «Արմենպրես»-ը, տեսանյութը Իրաքի Ֆալուջայի տարածաշրջանում ադրբեջանցի և թուրք ԻԼԻՊ-ականների' միասին ընթրելու մասին է: Տեսանյութը նկարահանել և համացանցում տեղադրել է ադրբեջանցի մի երիտասարդ: Տեսանյութում Աբու Հաթաբ անունով ադրբեջանցին ասում է. «Այսօր մեր ընկերոջն ամուսնացրեցինք: Մեզնից ով էլ հայտնվում է շուկայում, այնտեղից ամուսնացած է վերադառնում»:

Ենթադրվում է, որ խոսքը ԻԼԻՊ-ի կողմից առևանգված և գերեվարված հազարավոր եզդի կանանց առևտրի շուկայի մասին, որտեղ իսլամիստները նրանց վաճառում են 40-60 դոլարով:

Տեսանյութի վերջում ադրբեջանցի Աբու Հաթաբը սպառնում է Ադրբեջանի «անհավատ» մահմեդականներին, և կրկին կոչ անում նրանց միանալ իրենց «սուբ գործին»:

Սիրիայում կառավարական ուժերի դեմ իսլամիստական խմբավորումների մարտերում 2014 թ. ընթացքում սպանված Ադրբեջանի քաղաքացի մոջահեդների թիվն անցնում է 100-ից: Թուրքիայում Ադրբեջանի դեսպանատունը հաստատել է ադրբեջանցի մոջահեդների' Թուրքիայով Սիրիա և Իրաք անցնելու փաստը:

Ադրբեջանական ԶԼՄ-ներն ավելի վաղ հայտնել էին, որ Սիրիայում և Իրաքում ԻԼԻՊ-ի շարքերում կռվում են մեծ թվով Ադրբեջանի քաղաքացիներ, իսկ Սիրիայում ամբողջ պատերազմի ընթացքում ոչնչացվել են 200-ից ավելի ադրբեջանցիներ: 2013 թ. մայիսին Սիրիայում կռվող ադրբեջանցիները հանդես էին եկել հերթական տեսադիմումով, որում հայրենակիցներին կոչ էին արել ջիհադ (պատերազմ' հանուն հավատի) անել Սիրիայում: