«Վրաստանը պետք է մաքրվի աղբից». Ղարիբաշվիլի

Վրաստանի վարչապետ Իրակլի Ղարիբաշվիլին շրջակա միջավայրի պահպանությունը և մաքրությունը համարել է իշխանությունների գլխավոր գերակայություններից մեկը: «Աղբ նետելը Վրաստանում պետք է ամոթալի դառնա»,-հայտարարել է վարչապետը՝ մեկնաբանելով «Կանաչ ապագա» նախագիծը, որի շրջանակներում անցած շաբաթ Թբիլիսիի մերձակա Ռուսթավի շրջանում տեղի է ունեցել տարածքի մաքրմա ն ու կանաչապատման ակցիա, տեղեկացնում է «Արմենպրես»-ը՝ հղում անելով «Նովոստի Գրուզիա»-ին:

Ղարիբաշվիլիի խոսքով՝ տարածքը աղտոտելու համար սահմանված տուգանքները կբարձրացվեն: Ներկայում դա պատժվում է 50-ից մինչև 500 լարիի չափով տուգանքներով:

«Վրաստանը պետք է մաքրվի թափոններից: Դա շատ կարևոր է: Արդեն խորհրդարան է մտել մի օրինագիծ, որի նախաձեռնողը շրջակա միջավայրի և բնապաշարների նախարարությունն է: Մենք կխստացնենք օրենքները և կավելացնենք վարչական տուգանքները»,-հայտարարել է վարչապետը:

Միաժամանակ կառավարությունը հատուկ ուշադրություն է դարձնելու անտառների վերականգնմանը, հավելել է Ղարիբաշվիլին: