Միյատովիչի հարցերն անհարմար վիճակի մեջ դրեցին ադրբեջանցի պաշտոնյային

ԵԱՀԿ ԶԼՄ-ների հարցերով ներկայացուցիչ Դունյա Միյատովիչը Հարավային Կովկասի ԶԼՄ-ների 11-րդ համաժողովի ընթացքում արձագանքել է Ադրբեջանի Նախագահի աշխատակազմի ներկայացուցիչ Քամրան Հասանովի այն հայտարարությանը, թե Ադրբեջանում խոսքի ազատության վիճակի մասին քննադատությունը միակողմանի է: Ինչպես հաղորդում է «Արմենպրես»-ն, իր արձագանքով Միյատովիչը վերահաստատել է այսօր Թբիլիսիում հնչեցրած գնահատականները: «Ես շատ լավ տեղյակ եմ խոսքի ազատության իրավիճակից Ադրբեջանում, ես այնտեղ եմ եղել բազմաթիվ անգամներ, ինձ հնարավորություն է տրվել մուտք ունենալ Ադրբեջանի բանտեր, ես այցելել եմ բանտերում գտնվող լրագրողներին և բլոգերներին, ես նույնպես լսել եմ պատմություններ այն մասին, որ այս մարդկանցից մի քանիսը «թմրավաճառներ» են, «խուլիգաններ» և այլն»,- նշել է Միյատովիչը՝ արձագանքելով այն պնդումներին, թե իբր ադրբեջանական բանտերում իրենց քաղաքական և լրագրողական հայացքների համար բանտարկվածներ չկան:

Միյատովիչն ընդգծեց, որ բազմիցս հանդիպել է Ադրբեջանի իշխանությունների հետ: «Այդ այցերի արդյունքում շատերը համաներվել են, սակայն քանի դեռ կան բանտարկյալներ, ովքեր այնտեղ են հայտնվել իրենց գրած կամ ասած բառերի համար, դա խնդիր է, և դա չի փոխվի՝ մինչև դուք չփոխեք դա»,- ասել է Միյատովիչը՝ հավելելով, որ իրենց խոսքերի և գրածների համար մարդկանց բանտարկելը չի լուծի Ադրբեջանում եղած որևէ հարց:

«Մարդիկ, ովքեր այստեղ են եղել ամեն տարի (ԵԱՀԿ ԶԼՄ-ների համաժողովի մասին է), և հենց այս պահին, երբ ես խոսում եմ, նրանք կամ տնային կալանքի տակ են, կամ նրանց արգելված է երկրից դուրս գալը, կամ բանտերում են: Որտե՞ղ է Ալսուն, որտե՞ղ է Խադիջան, որտե՞ղ է Մեհմանը, որտե՞ղ է Ալին: Նրանք քրեական հանցագործնե՞ր են՝ ես այդպես չեմ կարծում»,-եզրափակել է Միյատովիչը: