Օմանում մեկնարկում է «վեցյակի», ԵՄ-ի և Իրանի բանակցությունների հերթական փուլը

Օմանի մայրաքաղաք Մասկատում նոյեմբերի 11-ին սկսվում է միջազգային միջնորդների «վեցյակի», ԵՄ-ի և Իրանի բանակցությունների հերթական փուլը, տեղեկացնում է «Արմենպրես»-ը:

Միջազգային միջնորդների «վեցյակը» (ԱՄՆ, Ռուսաստան, Մեծ Բրիտանիա, Ֆրանսիա, Չինաստան և Գերմանիա), Իրանը և Եվրամիությունը բանակցություններ են վարում Թեհրանի միջուկային ծրագիրը միջազգային հսկողության տակ դնելու և դրա խաղաղ բնույթը հաստատելու շուրջ՝ միջազգային պատժամիջոցների աստիճանական չեղարկման փոխարեն:

Իրանի արտաքին գործերի նախարար Մոհամադ Ջավադ Զարիֆը, ԱՄՆ-ի պետքարտուղար Ջոն Քերին և ԵՄ-ի հատուկ ներկայացուցիչ Քեթրին Էշթոնը նախօրյակին չպլանավորված հանդիպում են անցկացրել, որի ընթացքում մամուլի համար փակ դռների հետևում շարունակել են քննարկել Իրանի միջուկային հիմնախնդրի վերաբերյալ համաձայնագրի մանրամասները:

ԶԼՄ-ները հաղորդել են, որ ընթացիկ բանակցություններում կողմերը, ինչպես սպասվում է, կարող են պայմանավորվածության հասնել համապարփակ համաձայնագրի կնքման հարցերի շուրջ:

Ավելի վաղ «Կոմերսանտ»-ը նշել է, որ Իրանի և «վեցյակի» միջև համաձայնագիրը փաստորեն համաձայնեցված է, բացի պատժամիջոցների չեղարկման հարցից: Ինչպես հրատարակությանը հայտնել է ռուսական դիվանագիտական մի աղբյուր, չլուծված է մնում, ըստ էության, «միայն մեկ հարց՝ պատժամիջոցները հանելու ընթացակարգը, փաստորեն համաձայնագրի բոլոր տեխնիկական մանրամասներն արդեն համաձայնեցված են, մնում են որոշ տարաձայնություններ, բայց դրանք բոլորն էլ լուծելի են քաղաքական կամքի առկայության դեպքում»:

Աղբյուրը պարզաբանել է, որ Իրանը ցանկանում է պատժամիջոցների ամբողջական չեղարկում համաձայնագրի հրապարակման օրը: Մինչդեռ, նրա խոսքով, այդ տարբերակն անիրատեսական է: «Կան միակողմանի պատժամիջոցներ, կան միջոցներ, որոնք ձեռնարկել է ՄԱԿ-ի Անվտանգության խորհուրդը: Դրանց չեղարկման գործընթացը որոշակի ժամանակ կպահանջի»,- նշել է թերթի զրուցակիցը, հաղորդել է ՌԻԱ Նովոստին: