Վերանորոգվել է Ծաղկաձորի մարզահամալիր տանող ճանապարհի նստվածքային հատվածը

Ծաղկաձորի մարզահամալիր տանող հանրապետական նշանակության (Հ-55) ավտոճանապարհի 7-րդ կիլոմետրում 2014 թվականի ապրիլի վերջին տեղի է ունեցել հողային պաստառի նստվածք: Հրատապ հիմնանորոգման ծրագրի շրջանակներում' ՀՀ պետական բյուջեի 2014 թվականի միջոցների հաշվին ՀՀ տրանսպորտի և կապի նախարարության «Տրանսպորտի ԾԻԳ» պետական հիմնարկի պատվերով նշված հատվածում կատարվել են վերանորոգման աշխատանքներ:

Մինչ վերանորոգումը, ճանապարհի 0.14 կմ երկարությամբ հատվածի հողային պաստառը և ճանապարհի ասֆալտբետոնե ծածկը գտնվում էր վատ վիճակում, առաջացել էին լայնական և երկայնական խոշոր ճաքեր, քայքայվել էին ասֆալտբետոնե ծածկի եզրերը, ապահովված չէր նաև ջրահեռացումը: Տեղի ունեցած նստվածքի պատճառով ձևախախտվել էին արգելափակոցները: Ինչպես «Արմենպրես»-ին տեղեկացրին ՀՀ տրանսպորտի և կապի նախարարության «Հայաստանի ավտոմոբիլային ճանապարհների տնօրինություն» ՊՈԱԿ-ից, «Կոտայքի ՃՇՇ» ՍՊ ընկերության կողմից կատարված վերանորոգման աշխատանքներից հետո իրականացվել են հողային պաստառի՝ ցամաքուրդային (դրենաժային) շերտով վերականգնման, ասֆալտբետոնե ծածկի կառուցման, ինչպես նաև նստվածքային հատվածում ջրահեռացման համակարգի և մետաղական արգելափակոցների վերականգնման, նշագծման աշխատանքներ, անվտանգ երթևեկության ապահովմանն ուղղված միջոցառումներ:

ՀՀ տրանսպորտի և կապի նախարարի հրամանով ձևավորված շինարարական օբյեկտը շահագործման ընդունող հանձնաժողովի կազմում ընդգրկված են եղել ՀՀ տրանսպորտի և կապի նախարարության, «Հայաստանի ավտոմոբիլային ճանապարհների տնօրինություն» ՊՈԱԿ-ի, «Տրանսպորտի ԾԻԳ» ՊՀ-ի, ՀՀ Կոտայքի մարզպետարանի, ՀՀ քաղաքաշինության նախարարության աշխատակազմի քաղաքաշինական պետական տեսչության, կապալառու կազմակերպության, տեխնիկական և հեղինակային հսկողություն իրականացնող կազմակերպությունների պատասխանատու աշխատակիցներ, շահագրգիռ համայնքի ղեկավարը։ Աշխատանքների պայմանագրային արժեքը 29 986 722 ՀՀ դրամ է: