Պուտինն սպառնացել է Էրդողանին

Ռուսաստանի Դաշնության նախագահ Վլադիմիր Պուտինը Թուրքիայի նախագահ Ռեջեփ Թայիփ Էրդողանի հետ վերջինիս խնդրանքով օրերս ունեցած հեռախոսազրույցի ժամանակ զգուշացնելու տոնով հասկացնել է տվել նրան, որ Թուրքիան այսուհետ չպետք է միջամտի Սիրիայի ներքին գործերին: Այս մասին, ինչպես հաղորդում է «Արմենպրես»-ը, հայտնել է ռուսաստանյան անգլիալեզու Moscow Times թերթը:

Թերթը հայտնում է, որ հեռախոսազրույցում Էրդողանը հերթական անգամ Պուտինին ասել է, թե Թուրքիան այնպիսի սահմանի է հասել, որ սրանից հետո չի կարող «անտարբեր մնալ Սիրիայում մարդկանց զանգվածային սպանությունների նկատմամբ»: Էրդողանի այս խոսքը չափազանց զայրացրել է Պուտինին, ով խիստ տոնով նրան զգուշացրել է չմիջամտել Սիրիայի ներքին գործերին և հավելել, որ հակառակ դեպքում Ռուսաստանը կկանխի տարածաշրջանում աղետալի պատերազմը բորբոքելու Թուրքիայի ցանկությունը:

Ըստ թերթի' Ռուսաստանի նախագահի այս խոսքից շփոթված Էրդողանը Պուտինին հարցրել է, թե նրա այդ արտահայտությունը կարո՞ղ է Թուրքիայի դեմ անմիջական սպառնալիքի իմաստ կրել: Պուտինն իր պատասխանում ասել է. «Պարոն նախագահ, Դուք իմ խոսքերն ինչպես ցանկանում եք, այնպես էլ ընդունեք»:

Թերթը գրում է, որ Ռուսաստանի նախագահը Էրդողանին հիշեցրել է հազարավոր մարդկանց մահվան պատճառ դարձած Սիրիայի ճգնաժամում Թուրքիայի վարած «սխալ և ագրեսիվ» քաղաքականությունը, ինչպես նաև «վեհության մոլուցքով տարված նախագահ Էրդողանի» կողմից ջիհադական ահաբեկիչների համար Թուրքիայի տարածքում գտնվող անվտանգության գոտիներում ճամբարներ ստեղծելու փաստը: