Օբաման ԱՄՆ-ի բարձրագույն պարգևն է շնորհել Սթիվի Ուանդերին և Մերիլ Սթրիփին
Գիտություն և Մշակույթ
ԱՄՆ-ի նախագահ Բարաք Օբաման հայտարարել է, որ Ազատության նախագահական մեդալ է շնորհելու ավելի քան մեկուկես տասնյակ մարդկանց, որոնց թվում են՝ քաղաքական գործիչներ, գիտնականներ, դերասաններ և գրողներ, տեղեկացնում է «Արմենպրես»-ը:
Ազատության նախագահական մեդալը հատկացվում է ԱՄՆ-ի ղեկավարի կողմից և Կոնգրեսի մեդալի հետ միասին ԱՄՆ-ի բարձրագույն քաղաքացիական պարգևն է, որը շնորհվում է հասարակությանը մատուցած ծառայությունների համար:
Այս տարվա դափնեկիրների թվում ընդգրկվել է «Օսկար»-ի եռակի մրցանակակիր Մերիլ Սթրիփը, որին Օբաման անվանել է բոլոր ժամանակների առավել նշանավոր դերասանուհիներից մեկը: Պարգև կստանա նաև երգիչ, կոմպոզիտոր և «Գրեմմի»-ի 25 մրցանակների դափնեկիր Սթիվի Ուանդերը:
Դափնեկիրների թվում են նշանավոր ֆիզիկոս, Մասաչուսեթսի տեխնոլոգիական ինստիտուտի 83-ամյա պրոֆեսոր Միլդրեդ Դրոսելհաուզը, ինչպես նաև 92-ամյա նշանավոր գոլֆիստ Չառլի Սիֆորդը: Մեդալը կստանան նաև տնտեսագետ, Նոբելյան մրցանակի դափնեկիր Ռոբերտ Սոլոուն, դերասանուհի Մառլո Թոմասը, կոմպոզիտոր Սթիվեն Սոնդհայմը: Հետմահու պարգևատրվել է բալետի արտիստ Ալվին Էյլին, որը մահացել է 1989 թվականին: Մյուս հայտնի դափնեկիրներն են՝ հեռուստահաղորդավար Թոմ Բրոքաուն, չիլիացի գրող Իսաբել Ալյենդեն: Ցուցակում կլինեն նաև քաղաքական և հասարակական գործիչներ Ջոն Դինգերը, որը գրեթե 60 տարի Կոնգրեսի անդամ է, Ռոբերտ Քենեդիի այրին՝ Էթելը, հնդկացիների իրավունքների պաշտպան Սյուզան Հարջոն:
Ազատության նախագահական մեդալով պարգևատրումը սովորաբար տեղի է ունենում ԱՄՆ-ի Անկախության օրը՝ հուլիսի 4-ին, հաղորդել է ՌԻԱ Նովոստին:


















































Ամենադիտված
Ադրբեջանից ներմուծված բենզինը պետք է մնա բենզալցակայաններում, չպետք է օգտվեն դրանից (տեսանյութ)