Իմ շրջապատում շատերը գիտեն Հայաստանի մասին. ՀՀ-ում Ֆրանսիայի նորանշանակ դեսպան

Հայաստանում Ֆրանսիայի նորանշանակ դեսպան Ժան-Ֆրանսուա Շարպանտիեն ՀՀ նախագահ Սերժ Սարգսյանին հավատարմագրերը հանձնելու ժամանակ ունեցել է նաև կարճատև զրույց և քննարկել ֆրանս-հայկական երկկողմ հարաբերություններն ու հեռանկարները: Նոյեմբերի 12-ին լրագրողների հետ հանդիպման ժամանակ դեսպանը կրկնեց այն խոսքերը, որ ասել էր նախօրեին Սերժ Սարգսյանին:

«Շատ ուրախ և հպարտ եմ, որ նշանակվել եմ Հայաստանի դեսպան: Հայաստանը Ֆրանսիայի համար կարևոր երկիր է, որի հետ մենք ունենք վաղեմի պատմություն և համագործակցություն: Երբ նոր էի նշանակվել դեսպան, պարզեցի, որ իմ շրջապատում շատերը գիտեն Հայաստանի մասին և հայերի մասին Ֆրանսիայում շատերն են խոսում: Տասն օր է, ինչ Հայաստանում եմ և պարզել եմ, որ Ֆրանսիան էլ այն երկիրն է, որի մասին Հայաստանում խոսում են»,- ասաց դեսպանը' հավելելով, որ այդ փաստն իրեն շատ է ոգևորել:

Դեսպանի աշխատանքի կարևորագույն առաքելությունը հայ-ֆրանսիական հարաբերությունների ակտիվացումն է, և Շարպանտիեն խոստովանում է, որ երկկողմ բարեկամական հարաբերությունների մակարդակն էլ ավելի զարգացնելու և բարձրացնելու համար ջանք չի խնայելու: «Տրամադրված ենք շարունակել այն մոտեցումների ոգով, որոնք եղել են մինչ օրս: Պետք է ծավալել երկխոսություն Հայաստանի պատկան մարմինների հետ և ընդհանուր ուժերով սկսել գործունեություն, որն ուղղված է լինելու ապագային»,- ասաց դեսպանը' հավելելով, որ քաղաքական բարձր երկխոսությանը պետք է հետևեն նաև‚ խորհրդարանական այցելությունները, մշակութային, գիտական, կրթական և գյուղատնտեսության ոլորտներում ակտիվ համագործակցությունը:

Ժան-Ֆրանսուա Շարպատիեն վերջերս է նշանակվել Հայաստանում Ֆրանսիայի դեսպան' այդ պաշտոնում փոխարինելով Անրի Ռենոյին: Մինչ դեսպան նշանակվելը Շարպատիեն աշխատել է Ֆրանսիայի ԱԳՆ կենտրոնական ապարատում, եղել ԵԽ-ում Ֆրանսիայի մշտական ներկայացուցչի տեղակալ: