Ռուսաստանը 20 մլն դոլար է հատկացնում Էբոլա տենդի դեմ պայքարելու համար

Ռուսաստանը շուրջ 20 մլն դոլար է հատկացնում Էբոլա տենդի դեմ պայքարելու համար: Այդ մասին, ինչպես տեղեկացնում է «Արմենպրես»-ը, հայտնել է ՌԴ-ի վարչապետ Դմիտրի Մեդվեդևը՝ ելույթ ունենալով Արևելաասիական գագաթնաժողովի նիստում:

«Առաջնահերթ միջոցառումներն այսօր պետք է նպատակամղվեն Էբոլա տենդի դեմ պայքարելուն: Ռուսաստանն այդ նպատակով հատկացնում է շուրջ 20 մլն դոլար: Տուժած շրջաններ են ուղարկվել մասնագետներ, դեղորայք և զանազան նյութեր: Մշակվում են այդ հիվանդության կանխարգելման և բուժման պատրաստուկներ»,- ասել է ՌԴ-ի կառավարության նախագահը:

Առողջապահության համաշխարհային կազմակերպությունը հաղորդել է, որ Էբոլա տենդից մահացածների թվաքանակը գերազանցել է 5 հազարը: ԱՀԿ-ի՝ նոյեմբերի 9-ի տվյալներով, վիրուսից առավել տուժած արևմտաաֆրիկյան երեք երկրներում՝ Գվինեայում, Լիբերիայում, Սիեռա Լեոնեում, մահացել է 5147 մարդ:

Ընդամենը վիրուսի զոհ է դարձել արդեն 5160 մարդ: Դրանով վարակվել է 14 հազար 98 մարդ: Էբոլայով հիվանդացածների թվի կտրուկ աճ է դիտվել Սիեռա Լեոնեում, որտեղ նոյեմբերի 9-ին նախորդած շաբաթվա ընթացքում հիվանդությունը հաստատվել է 421 մարդու մոտ, հաղորդել է ՏԱՍՍ-ը: