«ԱՄՆ-ն պետք է դադարեցնի ռազմական օգնությունը Բաքվին՝ մինչև Ալիևը չդադարեցնի իր ագրեսիան Արցախի և Հայաստանի դեմ»

ԱՄՆ նախագահ Բարաք Օբամայի վարչակազմը պետք է դատապարտի Ադրբեջանի կողմից անզեն ուղղաթիռի կործանումը և դադարեցնի Բաքվին տրվող ռազմական աջակցությունը: Նման առաջարկությամբ է հանդես եկել ԱՄՆ Հայ դատի հանձնախմբի նախագահ Արամ Համբարյանը:

«Օբամայի աշխատակազմը պետք է վճռականորեն դատապարտի ադրբեջանական օդուժի կողմից անզեն ուղղաթիռի կործանումը, որը թռչում էր ԼՂՀ տարածքով: Միաժամանակ ԱՄՆ-ն պետք է դադարեցնի Բաքվին տրամադրվելիք ռազմական օգնությունն ու դադարեցնի Ադրբեջանի հետ երկկողմ բոլոր համաձայնագրերը, մինչև նախագահ Ալիևը չդադարեցնի իր ագրեսիան ընդդեմ Արցախի և Հայաստանի: Սպիտակ տունը պետք է հրաժարվի այն գաղափարախոսությունից, որ պետք է կողմերի մեջ անպայման պահպանել պարիտետ: Փաստերը խոսուն են, և մենք պետք է առաջնորդվենք ԱՄՆ քաղաքականությամբ: Արցախը ժողովրդա վարությունն է, որ խաղաղության ձեռք է մեկնում, իսկ Ադրբեջանն իր հակահայկական ագրեսիայով հանդիսանում է էսկալացիայի առաջնորդն ու դիկտատորը: ԱՄՆ-ն պետք է կանգնի խաղաղության և ժողովրդավարության կողքին»,- «Արմենպրես»-ի փոխանցմամբ' շեշտել է Արամ Համբարյանը:

Վերջինս հանդես է եկել նաև տեսաուղերձով և կոչ արել ամերիկահայերին համախմբվել և իրենց տարածքի կոնգրեսականներից պահանջել դատապարտել Ադրբեջանի ագրեսիան:

Ղարաբաղա-ադրբեջանական սահմանի արևելյան հատվածի օդային տարածքում նոյեմբերի 12-ին ժամը 13.45-ի սահմաններում, ուսումնավարժական թռիչքի ժամանակ ադրբեջանական ԶՈՒ-ի կողմից հրադադարի ռեժիմի խախտման արդյունքում խոցվել է ԼՂՀ ՌՕՈւ ՄԻ-24 ուղղաթիռը: Խոցման վայրը շփման գծին չափազանց մոտ է: Հակառակորդը շարունակում է տարբեր տրամաչափի հրաձգային զենքերից ինտենսիվ կրակ վարել դեպքի վայրի ուղղությամբ: Ավելի ուշ Ստեփանակերտից հաստատեցին, որ նախնական տվյալներով կա երեք զոհ: Անձնակազմի հրամանատարն է եղել մայոր Սերգեյ Սահակյանը: «Արմենպրես»-ի հետ զրույցում ԼՂՀ նախագահի մամուլի խոսնակ Դավիթ Բաբայանը շեշտել է, որ հայկական ուղղաթիռը ռազմական գործողությունների համար չի եղել, ուղղաթիռում չի եղել զինամթերք, և ադրբեջանական օդուժն այն խոցել է թիկունքից:

Նոյեմբերի 12-ին կատարվածի առնչությամբ ԵԱՀԿ Մինսկի խումբը հաղորդագրություն էր տարածել ու դատապարտել կատարվածը:

Նոյեմբերի 13-ին Եվրամիությունը, դատապարտելով կատարվածը, կոչ արել միջադեպի մանրամասները պարզելու համար անհապաղ սկսել հետաքննություն և արդյունքները ներկայացնել միջազգային հանրությանը: