Ադրբեջանում Ալիևին փորձում են դրդել պատերազմի. «Կոմերսանտ»

Ադրբեջանում շատ զինվորականներ և քաղաքական գործիչներ կան, որոնք փորձում են նախագահ Իլհամ Ալիևին դրդել ուժային տարբերակի:

Այս մասին, ինչպես հաղորդում է «Արմենպրես»-ը, գրում է ռուսաստանյան «Կոմերսանտ» պարբերականը՝ մեջբերելով Հարավային Կովկասի խնդիրների վրա մասնագիտացող եվրոպացի դիվանագետին, ում անունը թերթը չի հայտնում:

Մեկնաբանելով ղարաբաղյան հակամարտության գոտում ուղղաթիռի հետ կապված միջադեպը, թերթի զրուցակիցը նշել է. «Ադրբեջանի զինվորականների և քաղաքական գործիչների մեջ քիչ չեն կոշտ գծի կողմնակիցները, ովքեր փորձում են նախագահ Իլհամ Ալիևին դրդել խնդրի լուծման ուժային տարբերակին: Նրանք հույս ունեն, որ Բաքվի կողմից զինված ուժերն ամրապնդելուն ուղղված միլիարդավոր նավթադոլարները թույլ են տվել փոխել ուժերի հավասարակշռությունը, և կարելի է ռեվանշի հույս ունենալ 1990-ականների սկզբին պատերազմում պարտության համար», -մեջբերում է թերթը եվրոպացի դիվանագետի խոսքը:

Նրա խոսքով՝ եթե մարտական գործողությունները վերսկսվեն, դրանք տարածաշրջանի համար կլինեն ավելի կործանարար, այդ թվում՝ նաև ադրբեջանական նավթային արդյունաբերության համար:

«Բայց արդյունքում ռազմական նպատակների հասնել, ամենից հավանական է, չի հաջողվի: Արդյունքը կարող է դառնալ Ադրբեջանում իրադրության ապակայունացումը: Կարծում եմ, Իլհամ Ալիևը դա հասկանում է և հնարավորություն կգտնի հանել լարվածությունը՝ թույլ չտալով, որպեսզի շփման գոտում միջադեպերը չբերեն լայնամասշտաբ պատերազմի», -ասել է նա:

Ղարաբաղա-ադրբեջանական սահմանի արևելյան հատվածի օդային տարածքում նոյեմբերի 12-ին՝ ժամը 13:45-ի սահմաններում, ուսումնավարժական թռիչքի ժամանակ ադրբեջանական ԶՈւ-ի կողմից հրադադարի ռեժիմի խախտման արդյունքում խոցվել է ԼՂՀ ՌՕՈւ ՄԻ-24 ուղղաթիռը: ԼՂՀ նախագահի մամուլի խոսնակ Դավիթ Բաբայանը հայտնել է, որ հայկական ուղղաթիռը ռազմական գործողությունների համար չի եղել, ուղղաթիռում չի եղել զինամթերք, և ադրբեջանական օդուժն այն խոցել է թիկունքից:

Ադրբեջանի ԶՈւ կողմից սադրիչ այդ միջադեպը դատապարտել են ՀՀ ԱԳՆ-ը, ԱՄՆ Պետքարտուղարությունը, ԵԱՀԿ Մինսկի խմբի համանախագահները: